Shillong, Ïaiong 19 : Namar ka jingwan jong ka aiom Lyiur na ka liang ka ophis treikam jong ka Sub-Divisional Officer (Civil), Sohra Civil Sub-Division, ka la kyntu ïa ki nongwan jngohkai pyrthei ba ki dei ban long kiba husiar haba ki leit kai sha kino kino ki jaka jngohkai pyrthei kiba don ha ka thain khnang ba kin lait na kino kino ki jingjia ba sngewsih.
Katkum ka kyrwoh sha ki lad pathai khubor, la pyntip ba kane ka jingbthah kadei namar ka jingwan jong ka aiom slap bad kumta, la kyntu jur ba katlah katïai ki paidbah ki dei ban kham kiar haba leit sha ki jaka ba long riat, long btuid bad ruh sha ki jaka ba don um.
“Haba phi don ha ki jaka ba don ka um kiar ban jngi ha ki jaka ba phim tip bad husiar ïalade haba phi ïohi ïa ka jingwan kynsan ka lat lat ne ka jingwan kynsan ka um,” ong ka kyrwoh.
La kyntu jur ïa ki paidbah kiba smat ban leit peitkai ïa ki jingithiang ki lum ki kwah, ki kshaid bad kiwei ki jaka ba itynnad ha ka thain Sohra ba ki dei ban long husiar bad kiar ruh na kaba leit marwei.
Ym tang katta, la lyntu ruh ïa kito kiba ïalam ïa ki khunlung ba ki dei ban phikir bha ïa ki haba ki leit sha kitei ki jaka.
La bthah ruh ba na bynta kito kibA kwah ban rung sha ki khlaw ki btap ki dei ban don da u nongïalam uba tbit shwa ba kin leit. “Kiar ruh na kaba ktah kulmar ïa ki kynja jingthung ha khlaw namar ym tip ïoh ki don shiah lane ki dei kiba sniew.”
Shuh shuh ban shngain, ki bor pynïaid ka ophis u SDO kala buh ryntih ïa ki kyndon bad baroh ki nongwan jngohkai pyrthei kidei ban bud ryntih haba ki leit sha ki jaka jngohkai.
Nangta la kyntu ruh ïa ki nongwan kai ba ki dei ban da peit bad khmih biang ïa ka jinglong jingman ka suinbneng ha shwa ba kin leit sha kitei ki jaka na bynta ka jingshngain jong ki hi.
Bad khatduh la kyntu ïa ki paidbah ba lada jia ba ki kynduh ïa kino kino ki jingjia ba kyrkieh ki lah ban phone ha Sohra Police Station ha une u number +91 76389 00103 lane ha Sohra Community Health Centre ha une u number +91 88373 60612.
Nangta la bthah ïa ki paidbah nongleit nongwan ba ki dei ban buh ïa kitei ki number haneng ha shwa ba kin leit shang kylleng ki jaka ha ka thain.
“Leit biang biang da ka jingkitkhlieh, ki kshaid ba ithiang, ki riat ba itynnad bad ki khlaw ki dei ki jongphi ba phin peit phin leit jngohkai, hynrei ka jingshngain jongphi kadei ka jingkitkhlieh jongngi. Kumta da kaba phi bud ïa kine ki jingbthah phin don ruh ïalade ha ka jingshngain,” bynrap shuh shuh ka kyrwoh.
