Nongpoh, Rymphang 19: Ka Bureau of Indian Standards jong ka Ministry of Consumer Affairs, Food and Public Distribution jong ka sorkar India ryngkat bad ka District Rural Development Agency, Ri-Bhoi District mynta ka sngi kala pynlong syndon da ka prokram ban pynsngewthuh paidbah halor ka jingdonkam ban tip ïaki mar ki mata kiba thok bad kiba shisha naduh ki marbam mardih, ki tiar electronics bad kiwei kiwei.
Ia katei ka prokram la pynlong ha Conference Hall jong ka DRDA hakaba la wan ban sngap bad shimbynta da ki nongïalam shnong na kylleng ki jaka jong ka dong Ri-Bhoi bala wan ban pynshai paidbah da u Subham Sanu bad ka Barisha Jyoti Baishya kiba dei ki Standard Promotion Consultant ka BIS haka jingdonlang ka kong Pdianghun Marbañiang District Program Manager DRDA, Bah S Marbañiang Addl. District Program Manager ka DRDA bad kiwei kiwei.
Haba kren sha ki lad pathai khubor hadien ka jingpynshai paidbah naka liang u Subham Sanu bad ka Barisha Jyoti Baishya kiba dei ki Standard Promotion Consultant ka BIS kila ong ba kum kine ki jait prokram ki long kiba donkam bad kongsan ha kane ka juk kaba mynta ba bun naki mar thok ki jur haki ïew ki hat ba ki paidbah ki donkam ban husiar bad ban tip ïaki tiar kiba shisha bad kiba thok lyngba ki hallmark, ki lecense no. bad kiwei kiwei ba ki paidbah ki lah ruh ban peit lyngba ka BIS Care App ban pynthikna ïaki mar kiba thok bad kiba shisha.
U la ong ruh ba ka jingthmu jong katei ka prokram ka long ban ai jinghikai sha ki paidbah ba kim dei ban ngop haki mar thok, hynrei ki dei ban tip ïak hok jong ki bad ka jinglong thikna ki mar ki mata kiba ki thied bad bam man ka sngi ha kaba ki paidbah ki lah ruh ban ujor lada ki lap ïaki mar ba suba sniew lyngba katei ka app haki mobile phone.
