Husiar!!! Byrthen ka HNLC ïa ki runar shim kabu bad dawa pisa ha kyrteng ka Seng na ki Nongkhañi

Shillong Naitung 24: Ka Seng Hynniewtrep National Liberation Council (HNLC) mynta ka Lah Sngi U Blei, ka la maham da kaba tyngeh pyrshah ïa ki runar kiba shim kabu bad pyndonkam bakla ïa ka kyrteng jong ka seng na ka bynta ban dawa pisa. Ka seng ka la byrthen ïa kito ki riewshim kabu ba kin husiar namar ka seng ka don la ka jongka tnad syntiat jongka ba kan phah wad jingtip bniah shaphang kine ki riew shim kabu bad lada jia ba ka lap kan leh da kaba tyngeh.
Ka HNLC ka la pynpaw shai ba kam donkti eiei ha kino kino ki kam be-aiñ kum ka dak jong ka jingburom ïa ka sorkar pdeng bad sorkar jylla bad ka la pyntip ba ka la bthah ïa la ka tnad syntiat ban wad ïa ki briew kiba donkti ha ka ban dawa pisa ha ka kyrteng ka seng.
Kane ka jingmaham ka HNLC ka la mih hadien ba ka la don ka jingmih ha ki kot khubor ba bun ngut ki briew ki la ïoh pdiang ïa ka shithi dawa pisa naka seng HNLC ha kylleng ka rilum Khasi bad Jaintia.
ïa kitei ki shithi dawa pisa la ai da ki ar ngut kiba la kam ïalade kum ki dkhot ka seng, kata ha ka kyrteng u M Rynjah, uba la kam ïalade kum u Finance Secretary ne da u Synshar Khymdeit kum u Area Collector jongka East Khasi Hills & Ri Bhoi.
ïa kitei ki shithi dawa pisa la ïoh pdiang da ki Khasi bad ki bar Jylla kiba dei ki nongkhaïi bad la dawa ha ka kyrteng jong ka jingsiew ïa ka “income tax” na ka bynta u snem 2023 bad kane ka jingdawa pisa ka sdang naduh ka T.15 lak haduh T.80 lak.
Ka HNLC ka la kyntait mardor ba kan donkti ha kane ka kam bad na ka liang u General Secretary uba bat ruh kum u Publicity Secretaryka HNLC u Bah Sainkupar Nongtraw ula ong, ka jingdawa pisa ka dei ka kam kaba la leh da ki runar bad kitei kiba la soi kyrteng kim don jingïadei eiei ruh em bad ka HNLC.
Ula byrngem ban leh da kaba tyngeh pyrshah ïa kito kiba pyndonkam bakla ïa ka kyrteng jong ka seng bad ong, “Kane ka long ka kam kaba sngewkhia bad ka HNLC ka la maham ïa kino kino kiba pyndonkam bakla ïa ka kyrteng jongka na ka bynta ka kam dawa pisa. Lada ngi lap, ka HNLC kam banse ban leh da kaba tyngeh namar ba kan pynthud ïa ka jinglong jingman ha kaba ïadei bad ka jingïakren iasuk”.
Ula ong ba kum kine ki jait jingjia ki dei kiba la jia teng ha ki snem kiba la leit, u Bah Nongtraw ula ong, ba u suba jur ba ka dei ka buit ban pynpulom ïa ka jingïaid shakhmat jong ka jingïakren ïasuk.
“Katba ka jingïakren iasuk ka dang ïaid shakhmat, ka lah ban dei ruh ka jingthmu kaba sha lyndet ban pynsuki ïa ki kam ki jam baroh da ki briew kiba kwah ban myntoi shimet” ula ong.
U Bah Nongtraw ula ong ba haduh mynta kam pat shim la don kano kano ka jingïasoi ïa ka soskular hapdeng ka Sorkar Pdeng, Sorkar Jylla bad ka HNLC bad kam shym la don ruh kano kano ka jingthmu na kano kano ka liang ban pyntroiñ ïa kane ka jingïakren ïasuk.
“Ka HNLC ka la kiar ïa bun kiei kiei bad ban ym leh ïa kino kino ki kam be-aiñ, kum ka dak jong ka jingburom ïa ka Sorkar India bad ïa ka Sorkar Meghalaya.
Ka HNLC kala dawa ruh na ki pulit ba kidei ban kem ïa kitei ki briew kiba donkti ha kitei ki kam be-aiñ.
“Ki bor sorkar ki dei ban shimkhia mardor ïa kane ka mat na ki tyllong jong ki shithi kiba la don ïa ka Letterhead kaba shu thok ban dawa pisa bad ban kem ïa kitei ki runar ban pynthikna ba kan don ka jingïakren kaba ïaid beit ïaid ryntih bad ba kan ïaid shakhmat bad ka HNLC ka la bthah ïa la ka tnad syntiat ba kan wad ïa ki briew kiba la tip kyrteng kum u Shynshar Khymdeit bad M.Rynjah,” ong u Bah Nongtraw bad ka bynrap ba katba ka jingïakren ïasuk kam pat poi sha kaba kut, ki paidbah ki lah ban noh synniang sha ka seng ha ka dur jong ka jingnoh sngewbha ne Donation.