Shillong, Rymphang 18: U Director ka tnad Tourism, u Bah Cyril V Diengdoh, u la pynmih ïa ka hukum sha baroh ki nongpynaid jong ki jaka jngohkai pyrthei ba ki dei ban leh khuid bad ban peit ba kan nym don kano kano ka jingbret pathar ïa ki jaboh, khamtam ïa ki plastik.
Ha ka hukum ba u la pynmih ha ka 17 tarik mynta u bnai, u Director, u la ong ba ki nongpynïaid ïa ki jaka jngohkai kidei ban shim ki lad ki lynti ban peit ba ki jaka jngohkai kidei ban long kiba khuid bad lait na ka jingijli. U la bthah ruh ba dei ban buh bun tylli ki jaka bret ñiut ne ki dusbin. Nangta ban mang ïa ki jaka ba ym bit da lei lei ban bret plastik ne ki plastic free zone.
U la ong ruh ba katba lah dei ban peit ba kino kino ki jingtrei ne ki jingpynkhuid kim dei pat ban ktah ïa ka jingitynad ka mei mariang.
Lah ban kdew hangne ba ka la don ka jingud na kiba bun halor ka jingjaboh ki jaka jngohkai pyrthei ha ka jylla, ha kaba ki nongleitkai ki pynjaboh da kaba bret ïa ki plastik, ki kot jot, ki bilor um, bilor kyiad kat haba lap. Kane ka jingleh pathar jong ki briew, ka la pynijli wat ïa ki jaka ba itynnad tam ha ka jylla. Ka la pynkhuslai ruh ïa ki bor sorkar kiba dang ïakhun tyngeh ban pynlong ïa ka kam shang suwari kum kata ka kam karkhana kaba lah ban aijam aijam ïa ki briew bad kumjuh ruh kaba lah ban pynmih kamai bad kyntiew ïa ka ïoh ka kot ki paidbah jong ka jylla.