Shillong, Risaw, 17: Ka Bosco Integrated Development Society (BIDS) ryngkat ka jingïatreilang bad ka Manbha Foundation bad ka Meghalaya Users Forum (MUF) ki la pynlong ïa ka jinghikai shna sabon kaba saw sngi, ka jingbatai halor ka Financial Schemes bad ka Entrepreneurship Skills Workshop na bynta ki briew kiba la laitluid na ka jingshah teh mraw ha u drok.
Ka Rehabilitation Integration Through Skills (RISE) projek ka dei kaba la bei jingïarap da ka Sorkar Meghalaya hapoh ka Voluntary Action Fund 2016-2017, East Khasi Hills District lyngba ka District Planning Office.
Ka phang pdeng jong kane ka jingai jinghikai ka long ban pynshlur, ban pynsngewthuh ïa ki khynnah ha ki jait kam kiba kham biang, ban ai kam ai jam, ka lad ban ïoh kamai bad ryngkat ban im ka jingim kaba janai nangne shakhmat.
Ïa kane ka jingai jinghikai kaba la long ha BIDS RKM Hall, Nongshilliang, Nongthymmai, Shillong la sdang naduh ka 13 tarik haduh ka 16 tarik mynta u bnai bad ha ka sngi sdang jong ka jinghikai la ai jingbatai da ka ktien lamphrang bad ka jingpynshai shaphang ka jingshah hikai pyntbit ïa ki khynnah.
Ha ki sngi kiba bud la ai jinghikai da ki Resource Person ban shna ïa ka sabon saitjaiñ bad sabon sum.
Ha ka 16 tarik la ai jinghikai halor ka phang Financial Schemes bad Entrepreneurship Skills.
La pynkut ïa kane ka prokram da ka jingsam ïa ki syrnot sha ki nongïashim bynta.
