Hiar kyrkieh ka liengsuiñ Spice Jet Delhi-Shillong ha kad liengsuiñ Guwahati ba shah byrngem pynbthei bom

Shillong, Risaw 25 : Ka liengsuiñ SpiceJet ba wan na Delhi sha Shillong (SEJ2448), kala hap ban leit hiar kyrkieh ha ka kad liengsuiñ Guwahati Lokapriya Gopinath Bordoloi International Airport (LGBIA) ha ka sngi Thohdieng namar ka jingshah byrngem pynbthei bom, kaba haba la pynthikna pat hadien ba ka dei kaba shu thok.
Kane ka dei ka sien kaba saw ba shah byrngem pynbthei bomb ki liengsuiñ SpiceJet ha ki por bala leit noh. Kane kala jia ruh ha ka por ba mih ki jingbyrngem pynbthei bom ki liengsuiñ ba la kot palat 250 sien hapoh ka Ri baroh kawei.
Ka jingjia ba dang shu mih ka dei ïa ka liengsuiñ Spicejet kaba kit ïa 75 ngut ki briew. Kane ka liengsuin kala jan poi sha Shillong haba ïoh pdiang ïa ka khubor ba byrngem pynbthei bom.
Mar mar u Pilot ula pynphai ïa ka liengsuiñ bad leit hiar sha Guwahati, ka kad liengsuiñ kaba don lut ïa baroh ki kor ki bor haba jia kino kino ki jingjia bym lah ban tip.
Mar syn hiar hapoh ka kad liengsuiñ, ïa kane ka liengsuiñ la ïalam sha ka jaka ba shngaiñ jong ka Tarmac bad ki bor pahara kila pynlong ïa ka jingtalasi ha baroh ki jaka ban pynthikna ïa ka jingshngaiñ jong ki nongleit nongwan.
Ki bor pynïaid ka Kad Liengsuiñ kila shimkhia mar mar ban khmih ïa ka jingshngaiñ jong ki nongleit nongwan bad ki nongpynïaid ïa ka liengsuiñ da kaba pynhiar mardor ïa ki na liengsuiñ.
Ka jingtohkit mynta ka dang ïaid shakhmat bad ka kompani SpiceJet kala pynlong ïala ka jong ka jingtohkit bad ka dang pynbeit ïa ki lad ki lynti ban lah pynpoi ïa ki nongleit nongwan sha Shillong.
Na ka liang ki bor pahara kila tohkit jur mynta ban lapdien ïa ki tyllong ha lyndet kine ki jingbyrngem pynbthei bomb ia ki liengsion.