Nongstoiñ, Nailur 25: Na ka bynta ban pynneh pynsah ïa ki khlaw ki btap, ki dieng ki siej bad ka jingjyrngam ka mariang, mynta ka sngi ki nongïalam ka kynhun nongrep ha ka jylla kaba la tip kum ka Hills Farmers Union, ki la hiar sha ka shnong Mawduh West Khasi Hills ban ïakynduh ïa ki nongrep katei ka thaiñ bad ban pynshai ruh kumno ban pynneh pynsah ïa ki khlaw ki btap, ki dieng ki siej na ka bynta ban pynjyrngam ïa ka mariang.
Ha ka jingïakynduh lang ha ka ïing dorbar jong katei ka shnong, ki nongrep na bun tylli ki shnong ba marjan ki la ïa poi ban sngap ïa ka jingpynshai jong ki nongïalam ka Union, ha kaba ïadei bad ka jingpynhneh pynsah ïa ki khlaw ki btap da kaba thung dieng ha baroh ki jaka kiba la synlen na ka jingpom pathar jong ki briew.
La pynïaid ïa ka jingïalang da u bah Sakhaïus Tympuiñ President ka HFU West Khasi Hills District unit, ha ka jingïadon ryngkat jong u bah Alfonbirth Kharsyntiew secratray ka HFU Sengkmie, u bah Lumlang Kharsyiemlieh secretary ka HFU West Khasi Hills, u S.Goswami u ba dei u stad pynneh mariang bad ki nongialam jong ki seng nongrep na katei ka thaiñ.
U S.Goswami haba batai kumno ban thung ïa ki tynrai dieng, hangno ban thung bad ha kano ka por dei ban thung, u la ong ruh ba ka jingthmu ba hakhmat eh ka long ym ban shut hung khlem da sumar, hynrei haba la thung dei ban sumar namar ka jingmyntoi kam dei tang na ka bynta ban pynjyrngam, hynrei ki nongrep bad kiba thung kin ïoh jingmyntoi ruh ha kiba bun ki liang.
U bah Phrangklin Kharbani uwei na ki riew rangbah u ba la sdang ïa katei ka projek thung dieng mynta u snem, u la kyntu ïa ki nongrep ba kin shim ïa ka nuksa na u kumno ban sdang ïa katei ka projek thung dieng. Nalor kata la ïoh ïa ka jingai jingmut na u bah Roshem Myrthong, ha kaba ïadei bad ki lad ban bad ïada ïa ki tynrai dieng ba la thung na ka jingpluh ding ha ka por tlang bad ka jing shah pynjot ha ki jingri jingdup kum ki masi ki blang bad kiwei kiwei.
U bah Alfonbirth Kharsyntiew ha kaba u la pynshai halor ki mat ba kongsan ban pynïaid shaphrang ïa katei ka projek thung dieng, kumno ban pyntyllun ïa ka kam na ka bynta ka jingmyntoi ha kiba bun ki liang bad ban kyntiew ïa ka ïoh ka kot jong ki long ïing long sem, khamtam eh ha ki nongkyndong kiba dang pahuh bha ki jaka ban pyntrei ïa katei ka projek.
