Hiar jurip ki heh ka Brahmaputra Board ïa ka jingïada ïa ka Wah Umngi kaba 18 klur

Mawkyrwat, Ïaïong 07 : Ban ai jingïada na ka jingshah bam ha ka jong ka khyndew ha ka um bah jong ka Wah Umngi, ha ka sngi saitjaiñ jong ka taïew ka 05/04/2025 ki heh ophisar na ka Brahmaputra Board ha ryngkat u MLA/MDC ka Ranikor Constituency lem bad ki ophisar ka Central Water Commission, Shillong ki la leit ban hiar jurip ïa ki shnong kiba don mar khap bad ka Wah Umngi namar ki la don mynta hapdeng jong ka jingma.
Ki shnong ba ki heh ophisar ki la leit ban hiar jurip ki kynthup ïa ka shnong Mawshaliah, ka Moilam B, ka Jamadwar kiba don mar khap bad ka Wah Umngi bad kine ki shnong ïa mynta ki don hapdeng ka jingma kaba khraw namar jong ka jingbam jong ka um ïa ka khyndew yn da la poi ka por lyiur ka la ju na kawei ka snem sha kawei pat.
Namarkata, ban long ka jingïada na ka bynta kitei ki shnong kiba mar khap bad ka Wah Umngi lyngba ka jingman pisa kaba 18 klur ban shna ïa ki lad jingïada na ka liang jong u General Manager ka Brahmaputra Board, u A. Kumar, u bah Pius Marweiñ, MLA/MDC ka Ranikor Constituency ha ryngkat ki tnad treikam jong ka Central Water Commission, Shillong, ka tnad treikam jong ka Water Resources, Shillong, ka North Eastern Regional Center, National Institute of Hydrology (NIH) Guwahati, ka Department of Civil Engineering, Assam Engineering College, Guwahati ki hiar ban leit sha kitei ki jaka ban peit bniah ha kano ka rukom yn leh ban ai jingïada kaba kham bha shuh shuh.
Ym tang kata, shuh shuh la ïoh jingtip ruh ba kane ka jingleit jurip jong ki ka dei ruh hadien ba ka jingpynsngew jong ki paidbah ba kim hun ïa kaei ba kane ka Brahmaputra Board ka la pyntrei ban shna. Kumta dei halor kata ka nongrim ba mynta ka sngi ki heh ophisar ki la hap ban wan peit ryngkat ka jingsngap ïa ki jingai jingmut jong ki shnong kiba don ha kitei ki jaka.
U General Manager jong ka Brahmaputra Board, u Abhay Kumar haba kren ha ki lad pathai khubor u la pynpaw ba kane ka jingwan jurip jong ki ha ka 05/04/2025 ka dei halor ka jingaiktien ne pynsngew jong ki paidbah nongshong shnong kiba mar khap bad ka Wah Umngi ba ka jingpyntrei ïa ka projek ban ïada na ka jingbam jong ka um ïa ka khyndew kam da ai jinghun ïa ki paidbah. Namarkata, da ka jingwan jong ki ha kane ka sngi ka long ruh ban sngap ryngkat ka jingtwat jingmut na ki nongshong shnong ba ha kano ka rukom yn leh khnang ba ka jingpyntrei kan ïaid beit ha ka rukom kaba dei bad ka ban neh skhem.
Ym tang kata, u la ïathuh ruh ba ka jingthmu ban pyndep ïa kane ka jingtrei ka long hapoh ki ar snem bad kumta ula buh ka thong ba ha shwa u snem 2026 kane ka jingpyntrei ïa kane ka projek kan long kaba jop bad pyndep katkum ka jingkwah jong ki paidbah nongshong shnong.
U bah Pius Marweiñ haba kren bad ki lad pathai khubor u la pynpaw ka jingsngewkmen namar ha kane ka jingleit jurip jong ki ïa kane ka projek ka la long kaba jop namar ïa ka jingpyntrei ban ïada ïa ka khyndew na ka jingbam jong ka um la nang pynïaid shait shait. Hooid! u la ong ba ki don pat ki jaka kiba hap ban pynkylla ïa ka rukom trei namar ba ki paidbah nongshong shnong kim hun ïa ka rukom trei namar ki paidbah ki la pynsngew ba ki kwah ba ka jingker kan long thik kumba la pyndep ïa ki jaka ha ka shnong Balat namar ka i skhem.
Namarkata, ha kane ka jingïakren ïa pynbeit bad ka Brahmaputra Board na ka liang jong kane ka board ruh ka la pdiang ïa ki jingai jingmut jong ki paidbah bad kumjuh ruh na u MLA ban yn pynkylla noh ïa ka rukom trei ha ki katto katne ki jaka, ong u bah Pius Marweiñ.
U la ong shuh shuh ba hadien ba la ïoh ban ïa pynbeit bha ryngkat ka jingïamynjur lang, ka Brahmaputra Board ka la rai ba nangne kan leit ban shong biang ïa ka jingïalang ban ïa pyrkhat thymmai kumba ki paidbah ki la dep ban pynsngew na ka bynta ban wanrah biang ka mang tyngka ba thymmai namar katkum ka DPR ne jingmang ba la dep kam pat dap.