Hiar jurip ka CoMSO ïa ka jaka talasi mynder ha Ratacherra, East Jaiñtia Hills District

By Mawphor Editor On Jul 1, 2025

Khliehriatt, Jylliew 30: Ka Confederation of Meghalaya Social Organization (CoMSO) hynne ka sngi Nyngkong ka la pynlong ka jingleit jurip ïa ka jaka talasi mynder (infiltration check posts) ha Ratacherra, East Jaiñtia Hills ban bishar bniah la ka la don ne em ka jingshim ïa ki sienjam kiba pyrkhing ban bishar bniah ïa ki kot ki sla jong baroh ki briew kiba rung lyngba kane ka khyrdop, bad ban pynthikna ba ki dei ne em ki nongshong shnong ka India.
Ïa kane ka jingleit jurip la ïalam da u Bah Sambormi Lyngdoh, Vice Chairman ka CoMSO, Jaiñtia Hills Region kaba kynthup ïa ka Hynñiewtrep Youth’s Council (HYC), Jaiñtia Students Movement (JSM) bad ka Jaiñtia National Council (JNC).
Ha kane ka jinghiar jurip la lap ba ka jingtalasi ka la long kaba bud pyrkhing bha katkum ka aiñ bad kaba dei ruh kaba kongsan khnang ban lah ban khanglad ïa ka jingwan rung beaiñ jong ki briew kiba na bar sha kane ka jylla Meghalaya, ha kaba ki la don ruh ki katto katne ngut ki briew kiba la shah bat bad shah pynphai namar ka jingbym don ïa ki kot ki sla kiba biang.
“Kane ka mat ka dei kaba kongsan bha na ka bynta ki nongshong shnong ka Jylla Meghalaya, namar ki briew kiba na bar ki bym lah ban pynshisha ki lah ban wanrah shibun ki jingeh hapoh ka jylla bad iuhroit noh ïa ka hok ka jong ngi,” ong u Bah Sambormi.
Nalor kata ka CoMSO ha ka 21 tarik u Jylliew ka la khot pynlong ïa ka jingïalang ha ka nongbah Shillong bad mynjur ïa ka rai ban bishar bniah ïa baroh ki jaka talasi kiba don ha ka jylla.
Ka CoMSO ka la pynpaw ba kane ka jingleit jurip hynne ka sngi ka dei tang ka jingsdang da kaba pynleit jingmut ïa ki rukom treikam jong ki briew kiba don hapoh kine ki jaka talasi.
“Hynrei, ka la ong ba ïa ki sienjam ba kongsan ban tehlakam ïa ka jingwan rung kyrthep jong ki briew kiba na bar sha kane ka jylla yn sa pyntreikam ha ki sngi ki por ki ban wan, bad yn shim ruh ïa ki lad jingpynshitom lada donkam,” bynrap u nongialam ka CoMSO uba dei ruh u president ka JNC, Bah Sambormi Lyngdoh.