Hiar jurip ban pynthikna ba ka jingpyntrei ïa ka skhim umbam umdih jong ka SCWSS kan treikam pura

Mawkyrwat, Nohprah 18 : U Bah Renikton Lyngdoh Tongkhar uba dei u Nongmihkhmat jong ka Mawkyrwat Constituency mynta ka sngi ka 18 tarik u Nohprah, 2025 ula jurip kyndit kyndit ban lap da lade ïa ka jingtreikam jong katei ka skhim umdih ba la tip kum ka Sakwang Combine Water Supply Scheme (SCWSS) ha wah Rilang, Sakwang kaba jngai kumba 7 KM ei ei na Mawkyrwat, South West District Khasi Hill District, kaba la bei tyngka lyngba ka Rural Infrastructure Development Fund (RIDF) ha ka jinglut kaba T. 13/- klur, bad ula pynpaw ïa ka jingkmen kaba khraw hadien ba la lap ba kane ka projek ka la treikam pura.
Lah ban kdew ba ka jingjop jong kane ka projek sam umbam umdih kaba dei jong ka Sakwang Combine Water Supply Scheme (SCWSS), ka dei hadien ka jingleit jurip jong u bah Renikton Lyngdoh Tongkhar uba dei u Nongmihkhmat jong ka Mawkyrwat Constituency ha u snem 2020 na ka jingleit ïaid kjat jong u haduh 2 kynta shiteng ha ka por ba u dang bat kum u Myntri ka tnat PHE jong ka Sorkar Jylla.
Ka jingïaid kjat jong u ka dei naduh na Markhew, Jakrem haduh ha Jashiar ban wad ïa ka tyllong um ha Wah Rilang na ka bynta ka Mawkyrwat Greater Water Supply Scheme (MGWSS) ka la long kaba seisoh ha kaba watla ym shym la tan um shuh na Wah Rilang na ka bynta ka MGWSS, hynrei na katei ka jinghiar jurip la ïoh ïa ka tyllong um na ka bynta ka Sakwang Combine Water Supply Scheme (SCWSS) bad mynta kane ka projek ka la treikam pura bad ki lai tylli ki shnong, kata, ka Sakwang, Pyndensakwang bad Marshillong ki la ïoh um lyngba kane ka skhim.
Ha kawei pat ka bynta, u bah Renikton Lyngdoh Tongkhar hadien ka jingud jingnam jong ki paidbah ka thaiñ Shngimawleiñ halor ka jingjot noh jong ka jingkieng ïaid kjat ha Wah Rilang ha kaba ki paidbah nongrep katei ka thaiñ ki ju pyndonkam na ka por sha ka por na ka bynta ban leit rep leit riang, da lade ula leit jngoh ruh ïa katei ka jingkieng bad ula kular ban sa pynïoh skhim noh ha u snem 2026 na ka bynta ban shna ïa katei ka jingkieng ïaid kjat na ka bynta ka jingmyntoi jong ki paidbah nongrep.