Hauh 25 tylli ki shnong ki duhnoh ïa ki transformer: 30 ki shnong tang uwei u lineman: kynduh Myntri ka KSU

Mawkyrwat, Jylliew 27: Ka Khasi Students’ Union (KSU) jong ka South West Khasi Hills District ryngkat ka Khasi Students’ Union (KSU) jong ka Mawkyrwat Circle da ka jingsngewkhia bad halor ki jingeh jong ki paidbah, ha ka 26 tarik u Jylliew, 2024 ki la leit ban ïa kynduh ïa u Myntri ba dei peit ïa ka tnad bording jong ka Sorkar Meghalaya, u A.T. Mondal ryngkat ka shithi ban pynsngew ha u khnang ba un shimkhia bad leh ïa kaba donkam.
Kumta ha ka Press Conference ba la pynlong hapoh ka ophis treikam jong ka KSU ha Mawkyrwat, u bah Melven Marngar, Finance secretary KSU Mawkyrwat Circle bad Secretary Employment & Development jong ka KSU South West Khasi Hills District u la ïathuh ba ka jingleit ban ïa kynduh jong ka seng ïa u Myntri ba dei peit ïa ka tnad bording jong ka Sorkar Meghalaya, u A.T. Mondal ha ka 26 tarik u Jylliew, 2024 ka long hadien ba ki paidbah ki la ud la nam ha ka seng ba ka don ka jingthut bad dkoh ha ka jingtreikam jong ka ophis MePDCL jong ka Mawkyrwat Sub Division.
Shuh shuh ha ka jingleit ban ïa kynduh jong ka seng, ki la buh hakhmat jong u A.T. Mondal ïa ki lai tylli ki mat ba kongsan kata ka long halor ki jingdkoh treikam jong ka MePDCL Mawkyrwat Sub Division ha kaba ka la don ka jingduh noh ki 25 tylli ki shnong ïa ki transformer, nangta, ka jingduna jong ki nongtrei kum ki nongpeit ïa ka thaiñ Wahkaji, Phlangdiloin, Umdohlun, Rangthong, Nongnah bad Warsan Lyngdoh Area, ha kaba na ka liang ka Department ka thung tang uwei u Lineman bad don teng teng pat uwei u nongtrei u hap ban peit haduh 30+ (plus) ki shnong bad kane ka buh jingeh shikatdei ban pynbiang ïa ki jingdonkam jong ki paidbah ha kaba ïa dei bad ka bording..
Kawei dei ka jingkyrpang la long ha kaba ïa dei bad ki post bording kiba la bam sarang, ha kaba ka seng ka la buh jingkyrpad ba halor kine kum ka tnad treikam jong ka bording ka dei ban peit mardor khnang ba kan nym don kano kano ka jingthut bad kumjuh ki la dawa ba ïa ki post kiba ka bam sarang ruh dei ban bujli noh mar mar.
Namarkata, halor ki jingmat jingdawa, na ka liang jong u Forwardman Nongrem, President ka KSU South West Khasi Hills District ha ka jingkren jong u u la ïathuh ba u A.T. Mondal, Myntri ka tnad bording jong ka Jylla Meghalaya u la kular ba un sa phah khubor sha ka Mawkyrwat Sub Division ba kan sa leh ïa kaba donkam bad pynbiang ïa ki jingdonkam jong ki paidbah ha kaba ïa dei bad ka bording.
Kiwei de kiba la ïa donlang ki long u Rutherford Lyngdoh, President ka KSU Mawkyrwat Circle lem bad kiwei de ki para dkhot.