Ka ri Khasi la ju tip ïa ka kum ka ri tip briew tip blei bad ka jaidbynreiw Khasi ka dang dei ka jaidbynriew kaba ïoh suk tam ha ba ïa nujor bad kiwei pat ki jaidbynriew hapoh ka ri India wat ha kane ka thain shatei lam mihngi. Ka jaidbynriew ka don ha kata ka jaka ne ka khyndew ka shyiap kaba lah ban ong kaba itynnad kaba kaba khhring ïa kiba bun kiwei pat ki jaidbynriew. Dei namar kata ka daw la ïohi ba shibun ki briew kiba na bar ha ba la poi ban ïuh kjat hapoh u pud u sam ka ri Khasi um ju kwah shuh ban leit phai pat sha la ka jong ka jylla ne ka jong ka jaka, namar ba u shem hangne ka long shisha kum kata ka ri ka duk bad ka ngap. Hynrei katba kiwei ki dang ïoh ban kamai bad ban roi hapoh kane ka jylla napdeng jong ngi ki Khasi pat ki dang don hi kmie ki kpa kiba im lyngkar bad kine ki kha ïa ka longïng kaba lyngkar bad kaba ym don kano kano ka jingïapher na kiwei pat ki khar kiba poh ne ki khar khrong.
Haba ïoh sngew ïa ka jingpynmih hukum ka sorkar ba ym bit ban pyntrei shitom ia ki khynnah rit kiba hapoh ka 14 snem ka rta katkum ki kyndon jong ka Juvenile Act, hynrei aiu ka sorkar ka la leh ia kiba bun kito ki khynnah surok kiba im ha kaba khar ia ki tin jot bad ki jakhlia na ki jaka theh nuit. Lada ka khang ban pyntrei shitom ïa ki ba kin ïoh ïa la ka jong ka jingsiew balei pat ka sorkar kam shym la ïarap ia ki bad pynbiang ïa ki jingdonkam jong ki khnang ba kin lait na ka jingim kaba lyngkar bad kaba i sangsot.
Ha Shillong naduh ki thaiñ Motphran, Police Bazar, Laitumkhrah bad kiwei pat ki jaka la ïohi ba ki don ki khynnah rit kiba dei ki khasi kiba kim dei satia ba ki khrong hynrei ki ju rah ïa ki kot Book Mark bad ki ju die sha ki paidbah kiba ïaid lynti. Kitei ki khynnah rit ki ju pynbor bad pynjubor beit ïa ki paidbah ba kin thied ïa kitei ki Bookmark ha ka dor kaba 5 haduh 10 tyngka kiba na ki dukan la ju die ha ka dor 1 tyngka iwei. Haba ki paidbah kim treh ban thied ïa ki, kitei ki khynnah ki sdang noh da kaba kyrpad ban ïarap pisa ïa ki namar ba kim ïoh ban bam jingbam bad kane bun sien ka buh ïa ki briew ha ka jingsngewsynei ban ai ei ei ïa ki. Ha ki jingïaid lynti ba ha surok ki khynnah kum kitei ki ngat ha shibun ki jingeh bad ki jingpynshoi wat ha ka ka rta dang 8 snem bad duna ruh.
La don napdeng jong kitei ki khynnah kiba ïoh hi ia ka lad ban pule ha ki skul step, hynrei namar ka jingeh ha ki ïng ki sem jong ki ki la hap ban mih shabar bad kaba kham sngew myllung shuh shaphang jong ki, haba ki ïathuh ba ki ïarap wat ban pyndap pisa lang bad ki kmie jong ki na ka bynta ki jingdonkam ha ïing. Kitei ki khynnah Khasi kim bun than ha ba ïanujor bad ki khynnah dkhar kiba im ha ki tam tin jot bad plastik jot na ki dusbin. Hynrei kaba lyngngoh ka long ba hato ym don mo mano mano ban peit ban tyngrong lem na ka bynta jong ki.
Ka Childline kawei na ka seng trei mon sngewbha ka la trei shisha ban peit ia kitei ki khynnah surok bad wallam pat ïa ki sha ka jingim kaba dei biang, hynrei namar ba ka daw jong ka jinglong jong kitei ki khynnah ka dei beit na ka jingeh kaba ha ka longïng jong ki, kitei ki khynnah ki mih bad ïai mih ban im ïa ka jingim sha ki surok paidbah. Lada ka sorkar ka buh ïa ki kyndon ba ym dei ban pyntrei ïa kiba kum kitei ki khynnah ka dei ruh ban pynïoh ïa ka jingïarap kaba kyrpang na ka bynta jong ki bad ban teh lakam ba kim dei ban im lyngkar ha ki surok.
La ïohi ruh ba lyngba ka jingdon jong ka Reach Shillong kiba bun kitei ki jait khynnah ki la ïoh lad ban shah hikai bad ka jinglong babha ha katei ki khynnah ka la nangbsut bad mynta kim da long eh kum kito ki khynnah ha ki snem kiba kham mynshuwa.
Namar ba kan khambha shibun ïa ki khynnah ban ïoh ïa ki kam ba ki briew kin siew ia ki bad kumne ki ioh ruh ban hikai ia ki kam bad ynda haba ki la poi ha ka rta kaba heh kin lah ban long ki nongtrei kiba paka bad kiba janai bad ka jingim jong ki kan ym long kaba lyngkar. Hynrei namar ba kat kum ka aiñ kitei ki khynnah kim lah ban trei hynrei ki la hap ban shu leh da kitei ki kam kaba kim banse khnang ba kin lah ban bteng ia ka jingim ba man la sngi jong ki.
