Hato ym dei ba synjor ka jingtreikam ki khyrdop Infiltration sa ïoh rung ki mynder sha ka ri

K am dei shuh ka sien kaba nyngkong hynrei na ka por sha ka por ki pulit ne ki seng bhalang ki ju ïoh bat ïa ki mynder kiba wan na Bangladesh khlem ki kot ki sla kiba biang ba ki poi top haduh ha Shillong ne ha khap ka sor Shillong. Mynta ka sngi ruh ki pulit kiba ïatrei lang ki la ïoh ban bat ïa ki nong Bangladesh kiba wan da ka tourist taxi najan ISBT, Mawiong.
Kane ka jingïoh poi kine ki Khar Bangladesh shaduh shane sha nongbah Shillong hato kam pyni ne kdew ïa ka jingtlot bad ka jingbym shim khia ki Pulit Infiltration namar kumno kine ki briew kin lait na ki Khyrdop Infiltration kawei kaba don ha Rattachera bad kawei pat ha Byrnihat. Lada ki dei kiba wan na Guwahati ruh ki dei ban ngat beit ha Byrnihat bad lada dei kiba wan na Silchar ruh ki la dei beit ban ngat ha Rattacherra. Kane ka kren shai ba kam shym don kata ka jingshim khia jong ki pulit kiba don ha ka kam ha ka Infiltration ban talasi thikna ïa ki kali.
La ju ïohi hi bunsien haba leit ba wan lyngba ka Byrnihat ba ka rukom talasi ka long kaba i samrkhie bha teng teng shu tbeh tourchlight bad phah ïaid noh ïa ki tourist kam don ka jingtalasi ïa ki kot ki sla na kito kiba i suba ba ki dei kiba shu wan rung beaiñ. Lada ka long kumne lada pyntrei kam sa da ka aiñ aiu aiu ruh kam myntoi satia namar kaba kongsan ka dei ka jingshimkhia na ki nongpyntreikam ïa ka ai0241.
Hooid ki seng bhalang ki dawa ban pyntreikam ïa ka ILP ha ka jylla hynrei kan myntoi aiu tang kata ka aiñ lada ki nongpyntreikam ïa kata ka aiñ kim shym la shim khia, kumba long mynta ruh ki don bun ki kyndon aiñ khamtam ka MRSSA ruh ka dei ka aiñ kaba khlaiñ bha lada pyntreikam hok ïa ka hynrei lada ym pyntreikam hok kam don jingmut bad jingmyntoi lada wanrah sa da kano kano ka aiñ ruh.
Ha ka jingshisha ka sorkar ka dei ban shim khia ban phah tohkit ïa kiba don ha ka kam ha ki khyrdop Infiltration ban lap balei kine ki mynder ki ïoh ban rung sha Meghalaya khlem ki kot ki sla. Lada lap ba ki Pulit kiba don ha ka Infiltration kim treikam hok, dei ban ai ka jingpynshitom bad pynsaja ïa ki kat kum ki kyndon aiñ khnang ba kin shim khia noh nangne shakhmat ban pyrkhing ïa ka rukom talasi. Namar lada ka long kumne tang kiba ïoh kem ruh la bun spah ngut pyrkhat kiba ym ïoh bat ne ïoh kem katno ki la ïoh ban rung shapoh u pud u sam ka Meghalaya.
Ngam beiñ ïa kine kiba wan rung beaiñ sha ka jylla Meghalaya namar kumba long mynta hi ka Bangladesh ka la shah ktah lut nadong shadong naduh ba la pynhiar shuki jubor ia ka Sheik Hasina bad ba ka hap syndon an phet na la ka jong ka ri bad rieh tngen sha kiwei pat ki ri. Kine ki briew ki thaw ki lad ban ïoh sah noh ha kiwei kiwei ki ri ban ïoh shongsuk shongsaiñ, ban kamai kajih bad ban seng nongrim pat ïa ka longïing longsem hadien ba ki la shah ktah ha la ka jongka ri. Hynrei ki dei ki briew jong ngi ne ki bor jongka aiñ bad ki bor pulit keiñ kiba dei ban pyrkhing pyntreikam ïa ki aiñ khnang ba kin ym ïoh wan rung beaiñ hynrei ban wan rung da ka lynti kaba dei ryngkat ki kot ki sla kiba biang jong ki.
Ki bor pahara khappud ne ki BSF ki pyrshang hi ban pyrkhing pahara ha khappud hynrei ka long kaba eh bha ban khanglad bad tehlakam ïa ka jingïoh rung beaiñ ki nong Bangladesh namar ka rukom long ki lum ki wah ha ki bynta khappud ka buh ïa ki BSF ha ka jingeh ban ïohi najngai shajngai bad kito kiba la myllien ban rung ban mih na khappud ki tip bha ha kano ka por ban ïoh rung sha India bad ha kano ka por ba ki BSF ki ïaid pahara. Nalor kata ki don ruh sa ki nongïalam bad nongbtin lynti ïa ki ban ïoh rung sha India. Kumta ka buh bha ha ka jingeh ïa ki BSF ban ïoh bat ha khappud. Hooid bunsien ki ju ïoh bat hi tangba kumta keiñ haba ym ïoh ban bat na khappud dei pat ban ïoh bat ha kine ki khyrdop talasi mynder jongka tnad Infiltration ki Pulit. Nalor kata wat ki bor shnong bor thaw ruh ki dei ban pyrkhing bha da kaba dei ban tohkit bniah lada don kiba wan rung shnong thymmai khnang ban tip la ki dei ki nong India ne ki mynder ri.