La sakhi ha kine ki sngi ba ka la don ka thma ktien kaba jur hapdeng ki nongïalam jong ka BJP kiba la byrngem ban mih noh na ka sorkar MDA ba ïalam da ka National People’s Party hapoh ka jingïalam jong u Conrad K Sangma. Hynrei ha kajuh ka por pat la ïohi ba u Conrad la ong ba lada ka poi haduh uta u pud, ki nongïalam ka BJP na Delhi khlem pep kin pyntip beit ïa u lada don kano kano kaba ki kwah ban ong halor katei ka bynta kumba la byrngem.
Kane ka jingkren kob kylla sa na ka liang jong u Myntri Rangbah ka jylla ba dei ruh u nongïalam ka NPP kadei halor ka jingkynthoh jong u National Vice President ba dei peit ïa ka Meghalaya, u Dr. Chuba Ao ba ka party BJP kan sa weng noh na ka sorkar Meghalaya Democratic Alliance hapoh shibnai.
Katkum ka jingong jong u Conrad, katei ka jingkren jong u Dr. Chuba Ao ka dei ka jingkren shimet bad kam dei satia ka jingkren kum ka party bad u ong ruh ba kadei tang ka jingdawa shimet jong utei u nongïalam ka party ym dei da ka sur jong ka party ryngkat bad ki MLA jong ka. U Myntri Rangbah u ong ruh ba katei ka jingkren utei u heh BJP ym don satia kiba kyrshan la ka long na ki nongïalam ka party ha ka jylla lane na ki MLA.
Kawei pat kaba u Myntri Rangbah u kynthoh kylla halor ka jingbyrngem jong u Dr. Ao ba ki Enforcement Directorate (ED) bad ka Central Bureau of Investigation (CBI) kin wan ban khynra ïa ka sorkar MDA halor ka jingsuba bamsap, u Myntri Rangbah u la ong ba ka BJP ruh kam lah ban lait na kitei ki jingkynnoh namar baroh shi katta ki don bynta lang ha ka sorkar bad ka dei ruh ban kynmaw ba lada ka kdew kti ïa ka sorkar MDA ka dei ruh bankynmaw ba lai tylli ki shympriah kti ki kdew ïa ka hi.
Kawei pat ka bynta kaba kham pynshongshit ïa katei ka jingïakynad hapdeng kitei ki ar tylli ki party ka long ba na ka liang u MLA bad Myntri sorkar jong ka BJP Bah Sanbor Shullai u la pynpaw ba da lei lei ka BJP kan ym weng satia na ka sorkar synrop kaba la ïalam khmat da ka NPP.
Kaei kaba u Bah Sanbor u pynpaw ka long ba lada ki weng noh na ka sorkar ha kum kane ka por kan sa kyrtoh kylla namar kan pynlong ïa ki paidbah ban pyrkhat bakla bad ong pynban kaei kaban jia lada hap ban ïa treilang biang bad kijuh ki party ha u 2023 ruh.
Ha kaba kut kane ka jingwad daw jong utei u heh BJP ka lashu kut noh kumto namar na ka liang ki nongïalam ka BJP kumjuh da ki MLA ka BJP ka long pynban markhongpong.
