Hadien ki jingïakhih kiba jur ban dawa pyntreikam ia ka Inner Line Permit (ILP) kumba katto katne snem mynshwa, kaba la wanrah ka jingkulmar, jingjot jingpra ryngkat ka jingduhnong kaba khraw ha ka jylla, ka sorkar MDA ka la wanrah da ka Resolution hapoh ka ïing Dorbar Thawaiñ ka jylla na ka bynta ban pynbor ïaka sorkar pdeng ba kan pyntreikam ïa ka ILP ha ka jylla. Kane ka long ka lynti na ka bynta ban teh lakam ïa ka jingrung jingmih jong ki bar jylla kiba wan shane. Hynrei la bun bun snem kane ka kam ka la ïaid la ïohi ba ka kam ka dang sah pongding bad kam pat poi shano shano ruh, namar ka sorkar pdeng ka ai daw beit ba ka dang bishar shi bishar bniah ïa kane ka kam. Ka jingkylli ka long hato ka sorkar pdeng kan ai ne em ïa ka ILP ha Meghalaya. Lada ka ai ne kam ai ruh ka la dei ban kren beit da kaba shai ym ban pynsah umdum ïa ki paid nongshong shnong ka jylla.
Ha ka por ba long Myntri Rangbah u Dr Mukul Sangma u la rai ban pyntreikam da kata ka Comprehensive Mechanism kata ban buh da ki Exit bad Entry Point .Halor kane ka bynta ki Sengbhalang ryngkat ki briew jong ka sorkar ki la leit jurip ïa ki jaka ha Ri Bhoi District, hadien ba ki la wan jurip ïa ki jaka ha Jaintia Hills District.
Kine ki jaka ba thmu ban tei ïa ka entry bad exit point ki kynthup ïa ka jaka ban tei ïa ka entry point ba la thmu ban shim jaka ha 19mer kaba don kumba 15 akar ka jingheh jongka jaka bad na ka bynta ka exit point ba la thmu ban shim ha ki ar tylli ki jaka ba kynthup kawei ha 18 mer kaba don marjan bad ka entry point bad kawei pat kaba don sha 12mer ha Byrnihat kaba don tang 2 akar ka jingheh ka jaka na ka bynta ban tei ïa ka Exit point.
Kiwei pat ki bynta jong ka Comprehensive Mechanism nalor ki Entry bad Exit Point, kadei ka jingwanrah ïa ka aiñ ba la tip kum ka Meghalaya Residents Safety and Security Act, 2016 bad ka Meghalaya Benami Transaction Prohibition, Act 2016.
Ka jingïakhun ban teh lakam ka jingwan rung kyrthep ki bar jylla bad ki mynder hangne, kadei ka kam kaba la sdang naduh ki snem 1979 ter ter. Shibun ki mynsiem kiba kordor ki la duhei. Don napdeng ki nongïalam kiba la lamkhmat ïa kane ka jingïakhih ruh kim don shuh mynta. Hynrei sngewsih ban ong ba ka jingjyllei ki briew kiba nabar ka la nang bun nang bun bad ka Demographic Change ne ka jingkylla ka rukom long ki shnong ki thaw ne ki jaka ki puta ka pyni shai kdar ïa kane, khamtam ha nongbah Shillong.
Ka Comprehensive Mechanism jong ka sorkar ki dei ki Political Decision ne ki rai kiba mih naki bor sorkar. Ban ïada ïa ka jingwan kyrthep ki briew kiba nabar sha kane ka jylla, kam shong tang ha ki bor sorkar, hynrei ka donkam ka jingïasnoh ktilang jong kiba bun, naduh ki bor ka Autonomous District Council, ki bor Hima, ki bor Shnong bad kumjuh ruh ki nongshong shnong shimet shimet. Namar ba lada ka sorkar ka pyntreikam ïa ki aiñ, hynrei lada ki briew ki pynkheiñ ne ki pyndonkam bakla ïa kita ki aiñ kan nym poi shano shano ruh.
Balei la ong kumne, ka daw ka long ba ki la don ki jingtreikam kiba pyrkhing ïa ka jingwan rung kyrthep ki mynder, ha kaba la buh ïa ki Infiltration Check Gate jong ka tnad Pulit, hynrei kine ki Khyrdop kim treikam hok.Nangta kala don ruh ka aiñ teh lakam ïa ka jingwan bylla ki bar jylla shane, ha kaba la bthah ïa ki nongaikam ïa ki ba kin da register bad ka sorkar, hynrei kane ruh kam shym la poi shano shano ruh. Kyrmen ba kine ki lad ba thymmai jong ka sorkar,kan ïarap shisha ban teh lakam ïa ka jingwan ki mynder, lym kumta te ka la ima shaba palat palat.
Kane pat ka sorkar MDA mynta ka pynkhreh ban pynkhlaiñ ïa ka MRSS Act 2016 namar ka sngewthuh shai kdar ba ka jingkyllaiñ ka sorkar pdeng ban ai ïa ka ILP ka thew sha ka thong ba lehse kan ym ai da lei lei hi ruh ïa ka Meghalaya. Lada ka mon kumba ka leh ïa ka Manipur kan eh aiu kan leh ïa ka Meghalaya ruh. Hynrei wat la katta ruh shu ïa ap khmih lynti ïoh lehse da ka jing ïai leit tynruh u Myntri Rangbah bad ki Myntri Sorkar sha Delhi ïoh lehse ka sorkar pdeng kam banse ban ai la ka ai ïa ka ILP ha kane ka jylla Meghalaya ruh.
