Hato ka sorkar pdeng ka ïadon bynta lang ne em ha ka jingkren ïasuk? kylli u Dr Mukul

Shillong, Nohprah 1 : Shisngi hadien ka jingkhot hajir jongka ïing bishar ba kyrpang ka Natonal Investigatin Agency (NIA) ïa ki nongïalam ka seng HNLC na ka liang u Nongïalam ka Liang Pyrshah u Dr Mukul Sangma u la buh ka jingkylli hato ka sorkar pdeng ka ïadon bynta ha ka jingkren ïasuk bad ka HNLC ne hato ka sorkar jylla ka khot bad pynïadon bynta lang ïaka sorkar ha kane ka jingkren ïasuk bad ka seng HNLC.
U la ther tyngeh ïaka sorkar da kaba kynnoh ba ka la pheil namar ba ka shah ba kum kine kiei kiei kin jia na ki tnad treikam ka sorkar pdeng namar kine kin pynthut, pyntharai sniew bad pynartatien ne pynduh noh ka jingshaniah ïa ka seng HNLC halor kane ka jingkren ïasuk.
U la ong ki nongthaw aiñ ki la dei ban sngewthuh lypa kiei ki ban mih na kine ki jingkhot hajir. U la pynkynmaw ha ka por ba ïalam ïa ka sorkar da ka seng Congress la khot ïakren ïa ka seng HNLC “ Hynrei ka la shim por noh namar ngi kwah ban ïohi la ki nongïalam ka seng HNLC ki da thrang shisha ban kren ïasuk lane hato ka HNLC ka kwah ban jia kumba jia ïak a ANVC kumta ngi da bishar bniah bha sani nadong shadong ban lait na kiei kiei baroh.
Da kaba ai ka jingïaroh ïa ka jingkhot ïakren jongka sorkar ïa ka seng HNLC hadien ba la bishar bniah bha la slem une u myntri rangbah ba rim ka jylla u la ong “ Ka long kaba bha tam hynrei ka rukom leh pat nga ima ïoh ka duh ka jingshaniah kaba lah ban ktah pat hadien habud. Kumta ka sorkar ka dei ban shim khia bad pynshai kdar kiei kita ki kyndon jingkren ïasuk ba la ïasoi shwa ban pynïaid shakhmat ïa kane ka kam” ong u Dr Mukul.
Halor kane ka jingkhot hajir ka NIA ïa ki nongïalam ka seng HNLC khamtam ha kum kane ka por ba dang sdang ka jingkren ïasuk u Dr Mukul ul a ong ba kadei ka jingbym nang treikam ka sorkar ban pynthikna ba kum kine kim dei ban jia namar ki wanrah ki jingpynartatien bad pynduh ki jingshaniah.
U la dawa ba ka sorkar MDA hapoh ka jingïalam ka NPP ka dei ban ïakren bad pynbeit kloi ïa kane ka kam bad ka sorkar pdeng namar la ka long kumno kumno ruh ha kano kano ka jingïakren bad kano kano ka seng ba la shah kheiñ beaiñ ka sorkar India kan don bynta beit namar tang ka sorkar jylla marwei kam lah ban shim rai. Kane ka dei kawei na ki mat ba ka sorkar jylla ka ïai ap na ka sorkar pdeng ruh ha ka por jong ka sorkar Congress namar hap ïadon bynta lang ka sorkar jylla bad sorkar pdeng ruh.
Na kata ka daw u la buh ka jingkylli hato ka sorkar jylla ka la ïamir jingmut lang bad ka sorkar pdeng halor ki kyndon jingkren ïasuk namar kine ki jingjia kiba rit ki lah ban ktah pynban wat ïa ka jingkren ïasuk ruh. “ Baroh ki case ba la rejister pyrshah ïaki dkhot jongka HNLC dei ban weng noh katba ka jingïakren ka dang ïaid bad hadien ka jingïakren bad ïasoi ïa ka soskular la dei ban pynkhuid lut ïa ki case pyrshah ïaki. Hato ngi khlem leh kumta ha ka por jongka sorkar Congress? kylli u Dr Mukul.
U la ong ki case baroh pyrshah ïa ki dkhot ka seng ANVC la weng lut hadien ba la weng ïa ka jingkheiñ beaiñ ïa ka seng ANVC bad hadien ba kiba bun ki dkhot ki la mynjur ban mih noh na ka GNLA bad kiwei kiwei ki seng la mynjur hapdeng ka seng ANVC bad ka sorkar pdeng bad sorkar jylla ban sdang ia ka jingkren ïasuk. Ka thong ka long ba kito ki samla kiba la ïaid da ka lynti ïa umsnam kin wan noh ban ïatrei bad ïatei lang ïaka imlang sahlang bad wanrah ïaka shongsuk shongsain.
Kaei kaba jia mynta? “ La ïathuh ïa nga da ki dkhot ba haduh mynta ki dang hap ban leit mih beit sha ki ïing bishar halor ki case pyrshah ïaki” kynnoh u Dr Mukul. U la kynnoh shuh shuh ba kane ka sorkar ka la pynsangeh bad ïeh beiñ ïa ki dkhot ba pyndem jong ki seng bad pynduh ïa kaei ba la kular ïaki.
U la ong ba kane ka dei ka kam kaba dei ban bteng da kane ka sorkar namar ha kato ka por ym lah ban pyndep ïa kiei kiba dei ban siew sha ki khamtam ïa kito kiba la phet na ka GNLA bad wan ban pyndem. Kane ka sorkar ka la shu ïehbein ïakine ki samla da kaba kim ïoh ïa kaei kaba la kular. Kane kam wanrah ïaka dur ba itynnad ba ka sorkar ka kwah khot ïakren hadien pat ka wanrah ka jingduh jingkyrmen bad jingduh jingshaniah. Kumta kaei kaba donkam ka long ba ka sorkar ka dei ban pynpaw ba ka shim khia ïa ka kam khnang ba kan ïoh ïa ka jingshaniah bad ba kane ka kam kan poi sha ka thong ne kan long kaba seisoh, pynkut u Dr Mukul.