Katba nang ïaid ki sngi la ïohi ba ka National People’s Party ka la nang ïoh ban nang khring kham bun shuh shuh ki MDC na kiwei ki party kynthup naduh ka party UDP, Congress, PDF bad kiwei kiwei kum ka jingpynkhreh na ka bynta ka elekhson MLA kaban long ha u 2023. Dang ha kine ki khyndiat sngi la ïohi ba ka NPP kaba ïalam mynta ïa ka bor synshar ka la ïoh ban khring haduh arngut ki MDC na KHADC, kata kynthup ïa u MDC ka UDP na Mawlai Bah Teibor Pathaw bad ha kine ki khyndiat sngi pat kan pdiang sngewbha sa ïa u MDC ka Congress na Rambrai, Bah Bajop Pyngrope uba la resaiñ noh na ka party ha kane ka sngi Nyngkong.
Kumba long mynta hi, watla ka NPP ka la tam bun ngut ha ka jingbun paid ban ïa ka UDP kaba ïalam ïa ka Executive Committee hynrei ki nongïalam ka party pat ki kam beit ba da lei lei ka NPP kan ym pynkheiñ satïa ïa ka kular ban knieh noh ïa ka bor synshar na kti ka UDP. Lada baroh ki jingkren jong ki nongïalam ka NPP ba kin burom ïa ka soskular ban ai lad beit ïa ka UDP ban ïalam ïa ka bor synshar ha KHADC ka thew ba ïa ka Executive Committee hi yn ïalam beit da katei ka party riewlum tad haduh ban da kut ka samoi treikam kata haduh u 2024.
Tangba, ym lah pat ban tip kaei kaban jia hadien ka elekshon MLA kaban long ha u 2023 bad kiei ki jingkylla kiban mih hangtei.La kumno kumno palat mar shiteng na ki MDC kiba don mynta ha KHADC ki lah ban ïakhun ïa ka elekshon MLA ha u 2023 bad ha katei ka por ym lah ruh ban tip katno ngut na ki kiban ïakhun na ki party ba ki don mynta lane ki lah ban leit ïakhun na kiwei pat ki party. Hangne ruh ka dang don bun kiei kiei kiba lah ban pynthut wat ïa ka EC khyndiat bnai shwa ka elekshon MLA.
Kaban ktah eh ïa ka EC ha KHADC kan dei hadien ba la dep niew vote, khlem artatien ki MDC kiba jop ha ka elekshon MLA kin ïakhun pat ban ïoh ïa ka shuki Myntri ha ka sorkar jylla. Kaba kham pynsohkyrdot ka long ba lada jia kumno re kumno ka sorkar kaba thymmai kam dei shuh ka sorkar NPP-UDP hangta ruh la ktah biang ïa ka bor synshar hangtei. Ym lah ruh ban tip ba lada jia ba ka NPP ka ïoh ban synshar marwei hangta ruh ka EC ha KHADC kan ktah lang namar lada long kumno kumno ruh ka hap ban pyrkhat ïa ki MDC la jong kiba jop ban ai shuki CEM, Chairman lada kam lah ban ai shuki Myntri ha ka sorkar jylla.
Ki jingkylla ki dang bun bad nangne hi shakhmat ka jingïakhun kan shongshit namar ka la dei artad ka por ka ïa ba ki nongmihkhmat la ka long naduh ki MLA haduh ki MDC kin leit ban pynshai pynsngewthuh ïa ki paidbah ïa ka jingïakhun jong ki na ka bynta u paidbah ha ki saw ne san snem ba ki don ha ka bor.
Ym lah ruh ban len ba ka jingïakhun ha kane ka kynti kaba mynta kan dei peit hapdeng ka NPP-AITC-UDP-Congress nalor kiwei kiwei. Ha rilum Garo ki party kiban ïakhun hakhmat eh kin dei beit hapdeng ka NPP-AITC-UDP katba ha rilum Khasi ka jingïakhun ka kham bun namar hangne ki don ruh kiwei ki party riewlum kum ka PDF, HSPDP, KHNAM, VPP nalor ka BJP.
Ka lyer elekshon mynta ka la beh stet bha bad ha kine ki khyndiat bnai ban wan lei lei kan shongshit bha ha kaba ki kyrtong ba bun kin sa wan ban hiar sha ki shnong ki thaw ban pynshai ne khroh biang ïa ki paidbah ba kin kyrshan ïa ki sa shisien pat ha ka elekshon ban wan. Katba ki kyrtong kiba thymmai pat kin sa wan ban pan jingkyrshan ryngkat ki jingkular ba kin shakri kham bha ïa ki nongmihkhmat ba ha shwa. Kane ruh kadei ka por ba bun ki kynhun kin sa mih ban wad jingtip lyngba ka RTI ïa ka rukom treikam jong u ne ka MLA ha ki snem ba la dep bad lada ka jubab kaba ki ïoh ka pynhun lehse kan ïarap ïa uto hi u MLA hynrei lada jia ba kam long kato hi kan long ka ishu ban buh jingkylli bad ban ïoh pan jingshai kylla.
Lah ruh ban ong ba kine ki dei ki khyndiat bnai ba u paidbah u lah ban buh jingkylli ïa ki kyrtong khamtam ïa ki MLA ba kaei kaba ki la leh na ka bynta ka constituency ha ki saw snem tam ba ki long nongmihkhmat bad balei ba ki khlem lah ban pyndep ïa ka jingkular kaba ki la kular ha ki paidbah ha shwa ka elekshon.
