Hato ka jingpynbeit pud hapdeng ka Meghalaya bad Assam kan dang urlong shwa ban long ka election MLA jongka Assam? Namar ka Election MLA jongka Assam kan long ha u bnai Lber ne Iaiong jong u snem 2026 bad lada pyrkhat ka por ka la khim bha ïa u Myntri Rangbah ka Assam ban ïashim bynta ha ka kam ïakren pynbeit pud namar khlem pep un hap ban pynleit jingmut shwa sha ka election namar ka thong jongu ka long ban wan phai biang ha ka bor. Lada u wan phai biang ha ka bor lehse lada ym lah ban pynbeit shwa ka election hynrei hadien ka election ruh kine ki ar Myntri Rangbah ki dang lah hi ban ïai bud dien ïa kane ka kam namar kumba ka long hi haduh mynta ka BJP kan dang wan phai biang ha ka bor ha Assam.
Lada jia kumno re kumno ba kylla ka jingsynshar pat khlem pep kane ka kam pynbeit pud ruh ka lah ban sahteng biang kumba la long haki por ba mynshwa. Namar naduh ka por long Myntri Rangbah jong I (L) Bah E.K Mawlong ruh dei namar ka election bad ba u Prafulla Kumar Mahanta u khlem wan phai shuh ha ka bor ba sa kut ka jingpynbeit pud. Kumjuh ruh ha ka por jong ki Myntri Rangbah kum I Dr D.D Lapang, Dr Mukul Sangma ruh bunsien kane ka kam ïa pynbeit pud ka sahteng beit tang namar ba wan ka election ha Assam. Sa shisien pat mynta ruh haba kane ka kam kaba la ïaid bha sha khmat hapdeng ka jingïakren jong ki ar sorkar hapoh ka jingïalam jongu Myntri Rangbah ka jylla u Conrad K Sangma bad u Myntri Rangbah ka Assam u Himanta Biswa Sarma hynrei mynta pat ka la suki noh namar ba ka Assam ka la pynkhreh ïa ka election.
Ka jingkyrmen na ki paidbah ka long ba kane ka kam kam dei shuh ban dang ïai sahteng namar kumba la dep ïa pynbeit ïa kiwei ki bynta ba ïakajia donkam ban ïa pynbeit kloi noh sa ïakine kiba dang sahteng mynta khnang ban wan phai ka jingshngaiñ bad jingshongsuk shongsaiñ ïa ki paid khappud. Namar ym lah ban len ki paid khappud kiba mad eh ïa ki jingeh ki dei ki jongka Meghalaya namar ki shah pyndik ym tang ha ki bor pulit ka Assam hynrei wat ha ki riew kieng atiar ruh kumba mad ki nongrep sha Block I bad II da ka jingshah dawa pisa beit tang shu la dei ka por aiom kheit ne ot.
Watla ym pat lah ban pyndep ïa kane ka kam ïa pynbeit pud ruh ka jingïakren hapdeng ki ar sorkar khamtam hapdeng ki Chief Secretary, ki DC bad kiwei ki bor synshar District ka dei beit ban ïai bteng ban pynneh ïa ka jingïasngewthuh jingmut, ban lait na kino kino ki kynrum kynram. Namar na ka por sha ka por ka jia beit ka jingpynthut sha khappud kumba la jia ruh ha kine ki khyndiat sngi ha Lapangap ha kaba ki nong Karbi ki pyndik ïa ki paid Lapangap kiba leit sha ki jaka rep jaka riang jongki. Kane ka jingshah pynthut ki paidbah ka la pynlong ïa u Symbud Myntri Rangbah ka jylla u ma Sniawbhalang Dhar ban hiar da lade sha katei ka jaka mynta ka sngi bad ban pynthikna ruh hakhmat ki paidbah ba ka sorkar kan ym iehbeiñ ïaki hynrei kan ai ki lad jingïada ïa ki ba kin lait na kino kino ki jingshah pynwit ne jingthut haba ki leit sha ki jaka rep jaka riang.
Ka la donkam ruh ïa ki DC jong ki District mar khappud ka Meghalaya bad Assam ba kin ïakren bad peit ba ym dei mano mano ruh ba pynthut ne pynwit \ïa ka ïaid ka \ïeng ne ka rep ka riang jong ki paidbah ha khappud.
Namar lada ki bor synshar hi ki shim khia ban tehlakam ïa kino kino ki jingshim kabu, kan ym don kano kano ka jingpynwit ne pynthut ïa ki nongrep namar kiei kiei baroh ki shong ha ki bor synshar hi khamtam ki bor Pulit kiba peit ïa ka shongsuk shongsaiñ. Kumta khnang ban ïashong suk shongsaiñ kumba long baroh shi katta wat lada ym pat dep ïa pynbeit ïa u pud u sam ruh, kaba kongsan ka long ba ki bor sorkar jong ki ar jylla kin ïakren ba kito ki bor synshar kiba don ha ki bynta khappud kin peit ba ka jingshong suk shongsaiñ kan ïai neh bad ba ym don mano mano ba ïoh shim kabu ban pynthut ïa kata.
