Nongstoiñ, Lber, 26: Ha ka jingbuddien bniah jong u nongthoh khubor la lap ba na man la kawei pa kawei ka shnong kiba don ha khappud, ki don ki nongshong shnong kiba na ki shnong Garo bad Khasi, kiba pynrung ïalade ha baroh ar tylli ki thup kyrteng nongthep vote (electoral roll) jong ka Meghalaya bad Assam. Kiba kham bun ki nongshong shnong kiba leh ïa kata ki dei naduh ki shnong kiba don ha ka thaiñ Kamphaduli, Nawapara, Dronpara, Bangjeng ter ter haduh Kyrshai.
Nalor kata ki don ruh ki nongshong shnong kiba dei ki Khasi, kum na Langpih, Mawlan, Ïew-nongma, Mawdiang-snam, Umwali haduh Umbyrsit, kiba pynrung kyrteng ïalade ha ka Electoral roll jong ka sorkar Assam. Ka jingpynrung kyrteng jong ki ka long tang na ka bynta ban ïoh jingïarap kum ki skhim shna ïing shna sem bad kiwei kiwei.
Ki nongsynshar shnong, ki riew rangbah bad ki samla na kitei ki shnong, ki la ong ba ki don da ki hajar ngut ki nongshong shnong kiba don kyrteng thep vote ha Meghalaya bad Assam. Hynrei, kumba long mynta ym pat lah ban pynpaw ïa ki kyrteng jong kitei ki hajar ngut kiba don kyrteng thep vote ha baroh ar ki jylla.
Ki nongsynshar shnong ki la pynpaw ba ki kyndon ba ka ECI ka la pynmih, ka ong uwei u briew kawei ka vote. Kumta ka long kaba beaiñ ba uwei pa uwei u briew u lah ban thep vote ar sien lai sien ne kat ba u sngew bit. Ka shong ruh ha ka mon jong uwei pa uwei u ba pynrung kyrteng thep vote ïalade ha ki ar jylla ba kin rai shano kin leit sha Meghalaya ne sha Assam, ong ki riew rangbah na thaiñ Langpih.
Kumba long mynta na ka liang ka sorkar MDA 2 ka la pynkhreh shait shait ban ïa pynbeit noh bad ka Assam sa ïa kiwei pat ki jaka ba dang sah jong ka jingïapynbeit pud. Namarkata, hato kane ka jingdon ki ar maloi ha ka Langpih Sector kan ktah ne em ïa ka kam pynbeit pud jong ki ar Jylla.
