Ka jingkynthih dieng kper haduh 12 ngut ki MLA sha ka All India Trinamool Congress (AITC) ha u snem ba la dep ka la ktah haduh katta katta ïa ka seng Congress kaba dei ka party kaba khlaiñbor tam ha ka jylla baroh shi katta. Ym tang katta, ka jingleit kyrshan jong ki san ngut kiwei pat ki MLA jong ka party ïa ka sorkar MDA ba ïalam da ka NPP ka la nang pynktha khlieh shuh shuh ïa ka party ha ka jingpynkhreh ïa ka elekshon MLA kaban long ha u 2023.
Kumba long mynta, katei ka party ka paw kumba kam don MLA shuh namar ym don iwei ruh na kitei ki san ngut kiba leit ban ai jingshai sha ka party ïa ka daw ba ki leit ban kyrshan ïa ka sorkar MDA. Watla na ka liang ka Meghalaya Pradesh Congress Committee ka la dep ban pyntip sha ki bor ba hakhlieh duh jong ka Congress ha Delhi, ka All India Congress Committee hynrei haduh mynta ym pat tip satia kaei ka sienjam ba katei ka party kan leh ïa kitei ki san ngut. Ka jingkylli kaba mih ka long la kan ym ithuh shuh ïa ki kum ki MLA jong ka party lane kaei pat ka sienjam ba kan shim.
Ka jingsdang jongka party ban pynkhlaiñ ïa ka jingtreikam ha kito ki constituency ba mihkhmat da kitei ki MLA khlem ka jingkynjoh ktien lang na ki, ka la nang pynpaw shynna ïa ka jingbym kheiñ briew shuh jong ka Congress. Ym tang katta ki don ruh ki jingjia ba la mih ruh ka jingtyrwa kyrtong da ki nongïalam ba thymmai na kato ka Block khlem ka jingtip ne ka jingïa syllok lang bad kito ki MLA ba la jop na kato ka party ha u 2018.
Shaei kane ka rukom treikam kan ïalam, hato ka Congress ka la dep kheiñ jingkheiñ lypa ba kito ki kyrtong kiba ka thmu ban sei thymmai na kito ki constituency jong kitei ki san ngut ki don ka jingkyrmen. Hato katei ka sienjam ba ki shim kadei namar ki ïoh ïa ka jingtip kaba tikna ba kin ym ïakhun shuh na ka party ha u 2023 lane kiei pat ki daw kiba pynlong ïa ka party ban ïaid lait ne kiar na kitei ki nongmihkhmat.
La ïohsngew ruh kylleng ba na ki san ngut ki MLA saw ngut ki lah ban leit ïasoh sha ki ar tylli ki party kiba hakhmat tam ban thaw ïa ka sorkar synrop ha ka jylla, kata sha ka NPP bad UDP hynrei uwei na ki ym pat lah satia ban tip bad kano ka party un ïasoh. Hato un leit sha ka NPP lane ka UDP lane un dang neh beit ha ka party kaba u jop ha ka samoi ba la dep. Kine baroh ki jingjia ki pynkulmar jingmut ïa ki paidbah nongthep vote watla ka elekshon sha ka Iing Dorbar Thawaiñ ka jylla ka la sah sa tang kumba shisnem duna mynta.
Ym lah ruh ban len ba nalor ka NPP kaba la khring mynta bun ki kyrtong kiba hakhmat ban aireng ha kane ka elekshon ban sa wan, ka UDP ruh ka la ïoh ban tan lang katto katne, bud sa kiwei kiwei ki party riewlum. Na ka liang ka Trinamool Congress ruh mynta ka ïaid kylleng ban pynsngewthuh ïa ki paidbah halor ki nongrim ba ka ïeng ban ïakhun ha kane ka elekshon ban sa wan.
La ïohi ruh ba dang shen, u Bah Ardent Miller Basaïawmoit, MLA barim ka Nongkrem u la mih shakhmat bad ka kynhun ba thymmai ban seng ïa ka party kaba la tip kum ka Voice of the People’s Party (VPP). Kane ka party khlem artatien kan ïoh bha ïa ka jingkyrshan jong u paidbah namar kadei kaba la seng bad thaw hi na kane ka jylla.
Ka jingdon ki riewshemphang kynthup naduh ki nongïalam balang kiba wan ban ai ka jingtreilang bad katei ka party khlem pep kan wanrah ka jingshaniah ha ki paidbah bad kane hi kan ktah bha ïa ki kyrtong kiba aireng na kiwei ki party kaba lah ruh haduh u pud ba kin mad wat ïa ka jingshah rem ruh.
Na ka liang katei ka party thymmai ka dei ruh ban bishar bniah naduh mynta ban peit ba ki kyrtong bad ki nongïalam kiba ka shim kidei ban long kiba kynsai bad ki bym pat don dak sniew ha ka jingshakri paidbah. Da kaba leh kumta, ka jingkyrmen ka don ba ki lah ban ïoh bun bha ki MLA ha samoi jong u 2023.
