Bunsien la ju ïoh sngew ïa kane ka jingkylli na kiba bun ki riew paidbah khamtam haba ïashong kali kamai, hato ka jur bha ka jingïashun hapdeng ka tnad PWD bad ka tnad PHE. Balei ba kane ka jingkylli ka mih hakhmat eh ka daw ka long ba ki paidbah ki ju ïohi ba tang shu la dep ka tnad PWD ban pynbha bad siang rong ïa ki surok, tang katta la wan ka tnad PHE na dien ban kyndang ïa ki surok ba dang shu dep shna bad ban thep ïa ki pipe um jongka PHE. Kaba i saitmet eh ka long ba hadien ba la dep pynsniew ne klong ïa ka surok ba dang bha kim ju maramot mar mar hynrei ki ieh da ki bnai lynter don pat ki jaka ba la shu maramot tang dep rukom ym da kaba pynjanai ïa ka jingmaramot kumba shna ka tnad PWD ïa ki surok kiba bha.
Kane ka jia ha kylleng ki bynta jongka nongbah Shillong bad da kane ka jingleh torti ki kontraktor ka PHE ïa ki surok kiba dang bha mynta ki la sniew lut. Ne hato ka don ka jingïasuh buit para engineer ba tang shu dep shna dei ban pynjot noh da kaba leh mynleh thep pipe um ban ïoh ïa phah maramot biang ïa ki surok khnang ban ioh ïa bam pisa.
Lada kam long kumta ha ka jingshisha dei ban don ka jingiasngewthuh jingmut kaba jan hapdeng ka PWD bad ka tnad PHE. Ka PWD shwa ba kan shna pynbha ïa ki surok ka la dei ban ai jingthoh ne ïakren bad ki heh ka PHE la ki dang donkam ne em ban dang tih ïa ki surok ban thep pipe shapoh khyndew bad lada ki dang donkam ki dei ban pyndep noh kloi ïa ka kam bad hadien kata sa pynbha ïa ki surok khnang ba ki surok kin neh bun snem. Hynrei kane kam long satia kumta bad kam dei ruh ka sien ba nyngkong la ïohi ba na ka por sha ka por ki surok ki julor bad ki jot rakthai dei na ka daw ka jingleh beit jongka tnad PHE.
Kine ki tnad baroh ar tylli ki dei ki tnad kiba kongsan tam na ka bynta ki paid nongshong shnong naduh ka tnad PWD kaba peit bad sumar ïa ki surok, ki lynti ki syngkieng, haduh ka tnad PHE kaba pynbiang ïa ka umbam umdih sha ki nongshong shnong. Kaba kongsan ïa kine ki tnad ka long ba kin ïatrei lang da ka jingïasngewthuh jingmut khnang ban hun ban biang ki paidbah. Kam myntoi ban ïa ïaid la ka lynti lynti namar ka jingduh nong ka long ïa ki paidbah hi. Nalor kata ka ktah ruh ïa ka pisa u paidbah ban pynlut arsien lai sien ban shna ïa kajuh ka surok.
Kaba kongsan ka long nangne shakhmat ha ka por lyiur ka PHE ka dei ba pyndep ïa ki kam jongka ban tih bad pun ïa ki pipe um bad ynda la rang ka bneng bad ha ka por myntlang pat ka PWD kan ïoh ban siang rong bad pynbha ïa ki surok khnang ba kin long ki surok kiba skhem bad kiba neh bun bun snem. Namar kam don jingmyntoi ban maramot ïa ki surok ha ka por lyiur bad ka daw ka long ba ka rong ka shong synjor bad tang shu la wan u lapbah tang katta la julor lut ki surok ruh.
Kumta sa shisien ka jingai jingmut bad jingkyntu ka long ba kine ki ar tylli ki tnad ba heh jongka sorkar jylla ki dei ban don ka jingiasngewthuh jingmut haba ki ai ka jingshakri sha ki paidbah da kaba ïa pynbeit lang ïa ka aiom bad por ban ïatrei ne maramot ïa ki kam jongki.
