H a ki khyndiat sngi ba ladep, u nongkren jong ka seng NPP, ula kren bynñiaw ba ki kontraktor, kiba ïoh trei ïa ki kam jong ka sorkar kim burom satia ïa ki aiñ jong ka sorkar jylla bad ka dei na katei ka daw, ba ki sa ïoh buhai shnong ki bar jylla.
Katei ka jingkren jong U Bah Himalaya M. Shangpliang, ka long kaba dei hi sbiak, namar ba ka jingjyllei ki briew, kiba nabar, ka dei lyngba ki kam ki jam, ba ki wan trei sha ri Khasi Jaiñtia bad nangta ki sa ïohlad ban ïa shong tnga bad ki kynthei Khasi bad ki don kiba ïoh lad ban buhai shnong, da kaba ki trei ïa ki kam rit kam ria, kum ki kam die madan, ki kam die shana ki jingdie da kaba shu rah ïa ki tiar ha ki surok bad ban leit tyrwa ruh wat sha ki shnong ki thaw kiba ha sor Shillong bad wat sha ki thaiñ kiba kyndong kynshrot bad khamtam lei lei ban leit sha ki shnong ha ki thaiñ nongkyndong bad sha ki briew kiba duna ki jingnang jingtip bad kiwei kiwei pat ki jaitkam.
Hynrei katei ka jingkren, kam shym la syngngeit ne ktah tang ïa ki kontraktor, hynrei ka siat pharshi, ïa ka jingbym lerkam ki tnat jong ka sorkar jylla, kiba ai kam ïa ki kontraktor, namar ba kim teh da ki aiñ kiba tyngeh, ba ki dei ban ai kam ïa ki trai shnong bad katei ka ailad ïa ki kompeni, ki karkhana ba kin wan kit da ki briew kiba nabar, namar ba kam don ka kyndon aiñ kaba shai bha.
Kiba ïaid ba ïeng, ki ïohi, da la ki jong ki khmat ba ïa ka surok kaba T.1,600 klur, ba pyntrei na Shillong sha Dawki, kam don satia kano kano ka jingïoh kamai jong ki trai shnong, wat tang shi dana ruh bad lait noh na kaba ki die lilam, ïa la ki jong ki jaka ki puta ha ka dor kaba tad bad kaba la shah pynbor ha ki bor sorkar.
Ka surok bah kaba ïaid na Shillong sha Silchar, kaba la mih bha ha ki lad pathai khubor, hangtei ruh kiba trei ki dei ki kompeni jong ki heh spah kiba na shabar jylla bad tang u nongñiah ïa ka roller ruh, um dei satia u trai shnong bad la ïohi, ba kan don ka jingshim jaka kaba sa T.23 hajar klur antad ban tei surok heh na Umïam sha Silchar bad ha katei lei ki ban shah jynrat ki ïing ki sem, ki ban duh ïa ki jaka puta, kin dei ki trai shnong; katba ki ban bam ïa ka pasoh pasoh ka dohmet halor ka phew phew hajar klur, kin dei da ki kompeni ki karkhana heh spah bad sa ki nongtrei, ba kin wan ïalam na kylleng ka India.
Kumta ka jingkylli, ka long, ba ki trai shnong, ki lah ne em ban trei ïa katei ka kam bad lada jia ba kim lah, balei ka sorkar jylla, kam bei pisa ba kin thied ïa la ki jong ki tiar ki tar, ki mashin ne ba kin shah hikai kum ki nongñiah roller, bull dozer, JCB bad kiwei kiwei, ba kin lah ban shim ïa kitei ki kam, ba kin ïoh ban ïatreilang hi ki trai jylla?
Hangne ka don ruh ka bynta jong ka District Council, ki Syiem, ki Sirdar bad ki Rangbah Shnong lem bad ki trai jaka; la ki sngewhun ne em, ba kin shu ïoh kurup ïa ka lak ka phew lak ne ka klur, kaba shisien shi jingim jong ki, katba ïa shi saphit ka jingtrei ruh ka ban ïaid da ki phew snem, kim ïoh satia ban trei, hynrei la kurup lut da ki rynjiw rynjaw kiba wan na sha kylleng ka India, ba kin heh spah heh kamai bad kin ioh pyndap ïa la ki khun ki tnga, na ka jaka kaba la die duh ki trai shnong jong ka ri Khasi Jaiñtia.
Nangta ka jinglait lan ne ïoh rung suk ki bar jylla ne wat ki mynder ri sha jylla Meghalaya ka long ruh lyngba ka Anti Infiltration Check Post ne gate kaba don ha Byrnihat, haba kane ka paw shai lyngba uwei u mynder ri Bangladeshi uba la wan na Dispur ban wan ñiah da ka bycycle na shi lynter ka surokbah ban wan poi shaduh sha Laststop, Laban Shillong ban leit sah.
Une u mynder ri ne bar jylla u la phla hakhmat ka KSU Laban Circle ba u ïohi bym don nongap ha ka Anti Infiltration Check gate.
La ju don ruh ki jingkynnoh ba na kane ka khyrdop talasi ki briew kiba kwah rung beaiñ sha jylla ki shu siew tang 2 ne 3 spah tyngka ki la ïoh ban rung da kaba suk.
Nangta sa kawei pat ka long ba ki khar Bangladeshi ki nud ruh ban pynjulor ïa ki jingker sainar shiah jong ki shipai BSF kiba don ha shi lynter ka khappud ka ri India-Bangladesh ban prong jubor shapoh u pud u sam ka India ha ryngkat lang bad ka jingthmu jingmut kaba sniew ban pynmynsaw ïa ki nongshong shnong balui lui ki Khasi jong ngi kiba shong basah ha khappud bad kane ka la jia ruh ha ka thaiñ South West Khasi Hills bad Mawsynram ba ki Khar Bangladeshi ki la nud ban shoh ban thied pynmynsaw ïa ki nongshong shnong.
Kumta kaei kaba donkam mynta ka long ba haduh lano ngin kyndit bynriew bad haduh lano kito ki nongap ha Anti Infiltration Check gate ne kiba pahara sha ki khappud kin trei hok ia la ka kam ban ïada ïa ki nongshong shnong na ka jingshah tyllep ha ki mynder ri ne ki bar jylla bad ban ïada ïa ka pateng ban wan jong ki khun ki kti ba kin ïohi ïa ka lawei kaba biang ka kam ka bylla ban ïoh shongsuk shongshngaiñ hala ka jong ka ri baieid kaba dap da ka dud ka ngap, hynrei lada kane ka pateng kam lah ban pynduh noh ïa ka jinglalot spah kaba shu ïohei khlem da jaw syep ka long kaba ma shibun bha.
