Shillong, Jymmang, 08: Jan baroh ki samla kiba pule ha Manipur kaba dang don mynta hapdeng ka jingïaumsnam ki la poi suk ha ka Jylla, la ïathuh u Myntri Rangbah ka Jylla u Conrad K.Sangma ha ka Lah Sngi U Blei.
“Ka kynhun ba khatduh jong ki samla pule ka la wan poi suk ha Shillong. Ka dang don sa kawei ka liengsuiñ kaba ngi la pynbeit mynta ban kit beit beit ïa ki samla pule na Imphal sha Shillong,” la ïathuh u Sangma haba ïakren bad ki lad pathai khubor.
U la ong, ha kine ki lai sngi, palat 300 ngut ki samla la wan kit na ka jylla Manipur.
Haba pynpaw ba ka Sorkar Meghalaya ka la siew bai lynti ïa baroh ki samla pule, u Myntri Rangbah u la ong, “katno katne la shu siew lypa lane ki hap ban siew kum ka kynja jingïakut hynrei kita ki dei kam kiba kham kyllaiñ bad kumba phi tip, ngi don bun ki jingeh namarba ka Sorkar India ka la bthah ban ym phah ïa ki Chartered Flight bad namar kata ngi la hap ban shim da ki Commercial Flight bad kane ka donkam ïa iwei pat iwei ki khynnah pule ban siew hi na la ka jong ka pla lyngba ka Personal Account lane da ka pisa watla ka Sorkar ka kwah ban ot tiket naduh ka sngi nyngkong nalor ba ki ngi la ïakynduh ruh ïa ki jingeh.”
Shuh shuh u la pyntip, “hynnin bad mynta ka sngi, ngi la lah ban weng ïa kine ki jingeh bad mynta ka sngi la jan baroh ki samla pule kiba la sahkut ha ki shi sngi bad ar sngi na ki katto katne ki daw hynrei 99% ki khun samla jong ngi ki la wan phai lut sha Meghalaya.”
