Shillong, Naitung 17 : Kan long ka sien ba nyngkong eh ha ka histori jongka jylla lehse ban pynlong ïa ka jingiatem iaput ne iarwai ïasiaw hapoh Krem bad kane ka la jia long ha ka 16 tarik Naitung 2022 ha kaba la pynlong ïa Ki Sur Na Pubon hapoh ka krem Arwah, Sohra.
Ha katei ka prokram Ki Sur Na Pubon la ïashim bynta da ki nongrwai ba tbit na ka Sohra ba kynthup ïa ka Sohra Sienmang, Leonard Syiemlieh bad kiwei kiwei. Hynrei kaba kham shongshit ka dei ka jingdon ryngkat ka kynhun tem ba pawnam hapoh ka jylla, ka ri bad wat sha kylleng ka pyrthei ka Summersalt. Ki nongrwai nongput nongtem kane ka kynhun ki la long kum ki nongai mynsiem ïa ki samla jongka Sohra ba kin ïashim bynta ha kiba kum kine ki prokram.
“ïa Ki Sur Na Pubon la ïadon bynta lang ka tnad Tourism jongka jylla, ka MAL, Springboard Surprises bad ka Clean Sohra Campaign.
U Chairman jongka Clean Sohra Campaign u bah Alan West Kharkongor u la ong “ Ka krem Arwah ka la long ka krem ba pawnam khamtam ïakito ki stad wadbniah Archaeologist. Hynrei haba pynpaw nam ïa kane ka krem kum kawei na ki jaka jngohkai ngi dei ban kynmaw ban pynneh pynsah ïa ki jingitynnad jongka bad ngi dei ban pynsngewthuh wat ïa ki nongwan jngoh kai ruh kumno ba kin ïada bad sumar ïa kane ka krem haba ki wan jngoh ïa ka”.
Ym lah ban len ïa ka Sohra la kyrkhu shisha da U Blei da ka jingdon ki kshaid, ki krem, ki jingkieng jri bad kane ka la khring shisha ïaki nongwan jngohkai na kylleng bad kaba kongsan kal ong ban peit bad sumar bha ïakine ki jingai ba kyrpang jong U Blei. Ha kane ka prokram Ki Sur Na Pubon la ïadon lang ruh da u riewbna nam ha ka jingrung krem ha ka jylla Meghalaya bad wat sha kylleng ki ri ka pyrthei uba dei uwei na ki nongïalam ka Meghalaya Adventures Association u bah Brian Daly Kharpran lem bad ki dkhot kane ka kynhun.
