Hapoh ki khyndiat por yn sa pra biang ka TMC ha Meghalaya : CM
Thaw ïing paki ka AITC ha suiñ, kim sngewthuh ba ki paidbah kim pdiang ïa ki
![](https://mawphor.com/wp-content/uploads/2022/08/TMC-1.jpg)
Shillong, Naiwieng 20 : U Myntri Rangbah ka jylla uba long ruh u National President ka NPP u Conrad K Sangma u la ong ba hapoh ki khyndiat por ka TMC kan sa pait biang namar kin don ki MLA ki ban wan pynïasoh sha ka NPP bad sha kiwei kiwei ki party ruh. Kane ka jingïai pait ka TMC ka pynlong ïa ki paidbah ba kin duh noh ka jingshaniah ha kane ka party kaba tei ïa ka iing paki dulan jong ka ha shiteng suiñ namar bad kim sngewthuh ba ki paidbah kim pat pdiang satia ïa ki ruh.
U Myntri Rangbah u la ong “ 12 ngut ki MLA ka Congress hapoh ka jingïalam u Dr Mukul ki la phet bad pynïasoh sha ka TMC bad na kitei arngut ki la rai ban phet noh na kane ka party bad shen kin sa don ki ban wan pynïasoh sha ka NPP bad sha kiwei ki party ruh. Kane ka pynpaw ba kim don ka nongrim namar kumba ki shu leit pynïasoh tang ki MLA ym naduh ki paidbah kumta kane ka party kam shym la suhthied satia ha Meghalaya bad ïa kane ki paidbah kin sa ïohi ha kane ka election MLA 2023 namar lada ki kob sa kat ba kob ruh ka jingshisha kan sa paw pyrthei”.
U la ong shuh shuh ba kane ka jingïapait ïapra jongki ka la pynlong ïa ki paidbah ban dang ïai duh ka jingshaniah ha ki, namar ïa ki la pynjop ym na ka party TMC hynrei na ka party Congress bad kane ka jingphet sha ka TMC ka long kumba shet kylla ïa ki paidbah bad mynta ki la nang duh nang duh ïa ka jingshaniah. “ Sa tang khyndiat por kin sa don sa tang khyndiat ngut namar katba nang jan ka election katta ki la nangduh nangduh ïa ki MLA. Ngam pat kwah ban ïathuh kiei ki ban sa wan pynïasoh hynrei shen ki paidbah kin sa tip hi” ong u Conrad.
Kane ka jingïai pait ka dang pynpaw ïa ka jingïai tlot ka TMC ym ba ka nang kiew ne nang khlaiñ bor. Kumta ai ba ki paidbah kin bishar bad rai hi.
Nalor kane u la ong ka TMC ka dei kaba dang shu rung ha ka jylla hooid mynshwa ruh ka la wan hynrei jah noh namar ba kam lah ban kyrda bad kim lah ban seng nongrim satia. Kumta ruh mynta ki long thik kum kito kiba tei ïing paki dulan ha shiteng suiñ namar kim lah ban pdiang ïaka jingshisha ba kan dang shim por ïaki ban pdiang da ki paidbah ka Meghalaya bad kane ka thain hi baroh kawei. “ Kumta ha kane ka election ban wan ki paidbah kim pat pdiang ïa ka TMC kumba ki nongïalam ki pyrkhat namar kan dang shim por bha ba kin suhthied ha ka jylla. Khatam mynta lei lei ba mar ïa sdang la pra lyngkhot lyngkhai haduh saw san lyngkhot, kumta kane ka la pynduh jingshaniah ïa ki paidbah bad kan shim por ba kan ïoh ïa ka jingkyrshan na ki paid ka jylla ba kane ka thaiñ hi baroh kawei. Ka long kaei kaei kaba sngewthamula ïa ki nongïalam ka TMC ne ïano iano ban ong ba kin thaw ïaka sorkar ba thymmai. Nga kwah ban ong ïaki sngewbha pdiang ïaki jingshisha da kaba bishar bad phai sha lade haei phi don mynta. Namar ïa kano kano ka seng ne ka party ba kan skhem donkam ban ïoh ka jingpdiang shwa na ki paidbah bad hadien kata sa khih sa ksar ban nang pynklaiñ ïa ka” ong biang u nongïalam ka NPP.
U la kren ïa kane halor ka jingïai kob ki nongïalam ka AITC/TMC ba kin thaw ïa ka sorkar ba thymmai ha ka jylla.
Ha kaba ïadei pat bad u shimet u laong “ Ha nga hi uno uno uba ïaleh pyrshah ïa nga u dei u nongïa aireng uba tbit kumta ngam ju kheiñ sting satia wat la nga long u President ne u Myntri Rangbah ruh namar nga tip ba nga hap ban ïakhun beit da kaba tyngeh ïa u nongia aireng pyrshah ïa nga ngam dei da lei lei ruh ban kheiñ sting ngan ïakhun ban ïoh ia ka jingjop ba don burom”.