Shillong, Rymphang 21 : U Symbud Myntri Rangbah ka Jylla ba peit ia ka tnad Commerce & Industries, Bah Sniawbhalang Dhar ha ka sngi Balang u la pyntip ba ka sorkar jylla kan sa shim ia kai kaba khatduh hapoh ki hynriew bnai la kan khang khyrdep noh neem ia ka Mawmluh Cherra Cements Limited (MCCL).
Haba jubab ia kane halor ka jingkylli ba wanrah da u MLA ka VPP na Nongkrem Bah Ardent Miller Basaiawmoit, u Symbud Myntri Rangbah u la ong ruh ba ka mat na ka bynta ban shim ia katei ka rai ka don mynta hapdeng ka jingbishar bniah jong ka sorkar.
La iathuh ruh ba ka ka MCCL ka don haduh 278 ngut ki nongtrei bad naduh u snem 2020 ka la sangeh treikam.
“Hapoh ki hynriew bnai ngin sa sa lah ban shim rai halor kane,”ong u Symbud Myntri Rangbah. Shuh shuh u ong ruh ba ka sorkar kan sa shim lang ia ka jingsngew jong baroh kiba don bynta ha shwa ba kin shim ia ka rai ba khatduh.
“Nga kular ba ngin sa shim ia ka rai ba khatduh kaba dei bad yn ymdon mano manor uh ban shah ktah,” u la ong.
Haba jubab pat halor ka jingkylli ba wanrah da u MLA ka Nongthymmai,Bah Charles Pyngrope, u Symbud Myntri Rangbah u la ong ruh ba kin sa shim ia ki sienjam ban peit na bynta ki nongtrei jong katei ka karkhana pynmih dewbilat lada jia ba ka sorkar ka thmu ban khang noh ia ka.
Katkum ka jingong jong u, ia mynta hi, ka sorkar ka la siew katto katne sha ki nongtrei katkum ka jingdon pisa.
Shwa kane, u Nongialam ka Liang Pyrshah, Bah Ronnie V Lyngdoh u la pynpaw lang ia ka jingsngewkhia halor ka rukom siew sha ki nongtrei jong ka MCCL.
Na ka liang u MLA ka Sohra, Bah Gavin Mylliem pat u la kyntu ia ka sorkar ba kan pynstet ban shim ia ki sienjam da kaba syllok lang bad kito kiba don bynta bad buh hakhmat eh na bynta ka bit ka biang jong ki nongtrei.
