Hapoh 31 tarik Lber dei ban lilam noh ïa u dewïong ba ladep lum jingkheiñ : HC Committee

Shillong, Rymphang 11 : Ka Committee ba tang uwei u dkhot jong ka ïing Bishar High Court ka jylla, ka la bthah ban die lilam noh ïa u dewiong bala dep lum jingkheiñ biang hapoh ka 31 tarik Lber.
Ha ka kaiphod ba 12, u Justice (Retd)BP Katakey ula ong “Ka Committee ka ai jingmut ban lilam noh ïa baroh u dewiong bala dep lum jingkheiñ biang da ka CIL hapoh ka 31/3/2024 namar ka jingbym lah ban pyndep hapoh ka por ba la buh kham mynshuwa namar ka jingbym pynkut ïa u dewiong na ki par sha ki depot bala buh”.
“Ka ai jingmut ba dei ban shimkhia mar mar ha ka ban buh aplikeshon hakhmat ka ïing bishar ban lilam noh ïa u dewiong khnang ba baroh u dewiong uba la kurup, yn lah die noh mar mar” ula ong.
Ka kaiphod ka la ong ruh ba ka Committee ka la ai jingmut ba ka por ba khatduh ban shalan ïa une u dewiong sha ki depot ba la buh ka dei ban long noh hapoh ka 29 tarik Rymphang 2024 bad kumta ïa une u dewiong ba ïeh ha ki par, lada ki dang don bad bym pat die beaiñ ne khaïi beaiñ, dei ban kurup noh da ki bor Sorkar bad pynkit noh sha ki depot hapoh ka shibnai ban ïoh lilam noh ka CIL.
La ong ba ïa ka pisa ba ïoh naka jinglilam ïa une u dewiong ba kurup, dei ban pynthep da ki trai sha ka pla tyngka ka Sorkar kum ka jingpynsajia hadien ba ka CIL ka la dep lilam bad siew sha ka MEPRF. Dei ban pynbna paidbah ruh da ka ktien lajong ka Jylla na ka bynta ka jingtip jong baroh. Ha kajuh ka por, ka Committee ka la ai jingmut ban leh ïa ka drone survey bad ring video ha ki 4 tylli ki District hadien ka jingdep pynkit ïa u dewiong ba la lum jingkheiñ biang sha ki depot bala buh, khnang ban lap ïa ka jingdon u dewiong ba tih thymmai ha kine ki District, ba lada shem ba yn kurup biang ïa u hapoh ka kyndon ka MMDR Act, 1957 bad ban die noh ruh ïa u ha kaba ka pisa kaba mih yn thep sha ka pla tyngka ka Sorkar bad sha ka MEPRF.
Ka Committee kala ai jingmut ban pynmih ïa ka jingbthah ïa u Superintenent of Police ka East Jaintia Hills ba un pyndep kloi ïa ka jingtohkit halor ka jinglap ïa u dewiong thymmai ha Don Bosco College Byndihati (Khliehriat PS Case No 87(11)2023) khnang ba lada lap ïano ïano kiba donkti ha kane ka kam, kin ngat ha ki jingpynsajia hapoh ka aiñ.
Ka Committee ka la ai jingmut ruh ba u Deputy Commissioner ka East Jaintia Hills u dei ban aiti noh ïa ka kaiphod halor ka sienjam ba ula shim halor ka weighbridge bala pynieng ha lyndet ka Don Bosco College Byndihati hapoh ka artaiew.