Hapoh 20 sngi kular ka NHIDCL ban maramot noh ïa ka surok Shillong-Dawki

Shillong, Kyllalyngkot, 17: Da ki phew ngut ki nongïalam bad ki dkhot jong ka Federation of Riwar Mihngi Local Dorbar (FoRMLD) ha ka sngi Balang ki la rah da ki plakad hakhmat ka ophis treikam jong ka Regioal Office ka National Highways and Infrastructure Development Corporation Limited (NHIDCL), Shillong ban pynpaw ïa ka jingpyrshah halor ka jingbym maramot jong ka NHIDCL ïa ka surok Shillong-Dawki kaba la pynsuhsat haduh katta katta ïa ki nongleit nongwan bad ïa ki paidbah kiba shong basah ha ki shnong jong ka Riwar Mihngi.
Ha ki plakad ki nongïalam ka FoRMLD ki la thoh, “kiew dor ka bai kali, kiew dor ki mar ki mata dei namarba sniew palat ka surok,” “ngi dawa na u Local MLA ban pyni da ki kam, wat heh tang ka kular,” bad kiwei kiwei.
Tang hapoh katto katne por, ki ophisar jong ka Regional Office ka NHIDCL ki la khot ïakren ïa ki nongïalam jong ka FoRMLD ha kaba ki la kular ban maramot noh ïa ka surok Shillong-Dawki hapoh 20 sngi.
“Ngi la banjur (ïa ka NHIDCL) ban shna pynbha ïa ka surok Shillong-Dawki naduh Pynursla shaduh Tamabil. Kum ki nongshong shnong jong ka thaiñ Riwar, bad kum ka kynhun ngi ïohi ïa ka jingleh bym suidniew jong ka NHIDCL bad ki kontraktor wat haba ladep ban pynjot ïa ka surok mynta la lai snem,” la ong uwei na ki nongïalam ka FoRMLD.
U la ong, ba ka jingjot jong ka surok Shillong-Dawki ka la wanrah ruh ïa ka jingkiewdor ha ka bai kali kaba la ktah haduh katta katta ïa ki paidbah bad manla ka taiew ki kali ki hap ban leit sha karkhana namar ka jingpei thliew jong ka surok.
“Naduh Pynursla shaduh Dawki-Tamabil la ïohi ïa ka jingbym kheinkor bad la ïohi ba la iuhroit ruh da u MLA jong ngi uba dei u Symbud Myntri Rangbah bad uba peit ruh ïa ka tnat PWD (Roads). Ngi pynpaw ïa ka jingdiaw ha kaba ïadei bad ka jinglong jingman jong ka surok,” u la ong.
U la kam ruh ba ka ïoh ka kot ha ka thaiñ Riwar Mihngi la ka hiar haduh katta katta na ka daw ka jingsniew shaba palat jong ka surok Shillong Dawki.
U Bah Edmund Khongngai u la ong ruh ba watla ki sengbhalang na ka thaiñ Riwar Mihngi ki la byrngem ban pynlong ïa ka jingïakhih pyrshah ïa ka jingleh mynthi hynrei ka NHIDCL kam shym la patiaw satia bad kynnoh ruh ba ka shu pynbiej na ka por sha ka por. U la ong ruh ba watla ka SDO jong ka Pynursla Civil Subdivision ka la khot jingïalang ïa ki kynhun hynrei kam shym la poi shaei shaei ruh.
“Lada ka NHIDCL kam lah ban trei pyndep ïa ka surok ïa ka Phase-IV bad ka Phase-II kaba la sniew shaba palat ngi la kren shai watla ki bor ba dei peit ka NHIDCL ki la pynpaw ïa ki daw kiba ngim lah ban pdiang,” u la ong.
“Ngi la ïakren markhmat bad lada ka NHIDCL bad ka Sorkar kim shimkhia ban shna ïa ka surok, ngim banse ban mudui da ka PIL hapoh ka Ingbishar Meghalaya High Court,” la ïathuh u Bah Edmund ïa kaei kaba ki nongïalam ka FoRMLD ki la pynpaw hakhmat u General Manager ka Regional Office jong ka NHIDCL.
“Ngi kren da kaba shai ïa ka Sorkar, la lai tylli ki snem ngi la mad ïa ka jingsniew ka surok, ka jingkiewdor ki mar ki mata, ka jingkiewdor ha ka leit ka wan, ka jingshah ktah jong ki paidbah kiba pang ba shitom bad ki khynnah skul ki thud na ka daw ka jingthud ka surok ka bym shngaiñ ban leit ban wan ha ka por slap.
U la ong ruh ba ka FoRMLD ka phah ïa u kyrwoh sha u MLA ka Pynursla Constituency u Bah Prestone Tynsong lada ka jingmaramot ïa ka surok Shillong-Dawki kam urlong, u dei ban hiar noh mardor na ka shuki Myntri.