Hapdeng ki ummat kthang kynmaw ïeid ka ïing ka sem ïa ka lyngkhuh sngi ïap ba shi snem u Bah OB Ranee

Nongpoh, Naitung 16: Hapdeng ki ummat kthang bad ka jingkyn-maw tympang, ki khun ki kti bad ka ïing ka sem jong u Bah OB Ranee mynta ka sngi kila pynlong da ka prokram ba kyrpang ban kynmaw ïeid ïa une u rangbah u ba la noh synñiang shibun ïaka iing ka sem bad khamtam ïaka imlang ka sahlang.
Kum ban shu kdew hangne, u Bah O Benedict Ranee (bam kwai ha dwar u Blei) la kha ïa u haka snem 15 tarik Nailar 1958 bad u la khlad noh na kane ka sla pyrthei haka 15 tarik Naitung 2022. Une u rangbah u dei u wei na ki riew rangbah uba la noh shibun ki kam haka imlang ka sahlang ha ki thaiñ Ri-Bhoi, bad u dei ruh u nongseng ïa kawei ka seng trei mon sngewbha bala tip kum ka Ri-Bhoi Area Welfare Association (RAWA) kaba dei ruh kawei naki seng ka ba la trei shibun ki kam hapoh Ri-bhoi bad lyngba kane ka seng trei mon sngewbha une u rangbah u la lah ruh ban seng ïa shibun ki shlem ai jinghikai kiba kynthup ïaka Typing Class, ka jaka hikai suhjaiñ bad kiwei kiwei.
Kawei na ka shlem ai jinghikai kaba la seng lyngba une u rangbah kaba la ai jingmyntoi ruh shibun ïaki samla pule jong ka thaiñ Ri-bhoi kadei ka Sati Raja Memorial Secondary School kaba don ha Umsning Patarim bad lyngba kane ka skul la mih shibun ki khynnah ki ba shemphang la ka dei haka jingpule lane haki kam ïalehkai sports.
Ha kane ka sngi ki khun ki kti jong une u rangbah ki la ïoh ban plie ruh ïa u mot sah jingkynmaw jong une u rangbah haka phyllaw jong ka skul Sati Raja Memorial Secondary school, bad la ïoh ruh ban sam ïaka khusnam O.B Ranee Memorial Award sha ki arngut ki longkmie kiba la wan rah nam bad burom lyngba ka jingïalehkai sports bad haka jingpule bad la ïoh ruh ban pynlait paidbah syndon ïaka phlim lyngkot lane Documentary Film shaphang ka jingim bad ka jingïaid lynti jong u Bah O.B Ranee.
Ha kane ka sngi la wan ban ïa don bynta Lang da u Bah Mayralborn Syiem MLA ka Nongpoh, Fr. Pius Shadap, Parish Priest Umsning Parish, bah Rocky Marweiñ, Rangbah Shnong Umsning Proper B, bah Carlus Kharkongor, Vice President Barim ka RAWA, Bah Rocky Kylla Chairman Umsning Town Dorbar, ka Kong Alvareen Shangpliang, Asst Secretary RAWA, Kong Banisha Umbah Vice President RAWA kaba dei ruh ka khun Nongkong Jong u Late O.B Ranee, ki Khynnah Skul, ki ASHA bad kiwei kiwei.
U Bah Mayralborn Syiem MLA ka Nongpoh, haba kren ha katei ka lyngkhuh sngi ïap jong u bah O.B Ranee u la pynpaw ka jingsngewhun ka mynsiem ban ïoh ïadon bynta lang ha kum kane ka sngi kaba long kum ka sngi ka ban kynmaw kyrpang ïa une u rangbah. “Lada ngam ïoh ban ïadon lang ha kum kane ka sngi ngan sa kit ram baroh shirta ha u bah O.B Ranee”, la ong u Bah Mayralborn.
U Bah Mayralborn u ong ruh ba wat lada une u rangbah um don lang shuh bad ngi ha kane ka sla pyrthei, hynrei ki kam kiba bha kiba une u rangbah u la leh ngin nym lah shuh ban klet ïaki. U la ïathuh ruh ïa shibun ki kam ki ba une u rangbah u la leh naka bynta ka imlang ka sahlang. U la pynkynmaw ruh ba dei une u rangbah uba la shim khia ban pynpur ïaka khubor ban sangeh leit shabar pathar ha kylleng ki shnong jong ka them Ri-bhoi.
Shuh shuh u la ong ruh, u bah Benedict Ranee um shym la pyndep ïaki kam tang shabar hynrei u la pyndep ruh ïaki kamram kum ku longkpa haka ïing ka sem. Lyngba ki kam ba ki khun jong u bah Benedict ki leh bad ki akor ba ki don ka pyni ba u bah Benedict u la ai ka jinghikai kaba bha tam naka bynta ki khun ki kti jong u.
U Bah Mayralborn u la kyntu ruh ïaki khun ki kti jong u bah Benedict Ranee ba kin nang ïai trei shitom ban pynurlong ïaki kam kiba dang sah jong u kpa bad u la kyntu ruh ïaki dkhot jong ka Seng treimon sngewbha ka RAWA bad ïaki nonghikai ka Sati Raja Memorial Secondary School ba kin nang ïatrei minot ban ïalam ïaka seng bad ïaka skul sha kliar lum jong ka nam. U la ong ruh ba ka kyrteng jong u bah Benedict Ranee ka dei ban sah shirta haka mynsiem bad ki kam Jong ngi.