Hapdeng ka jingkyrduh kam kum ki khun samla, kyntu ka kong Syngai MCS ban shim ïa ki kam la jong

Jowai Risaw 12: Ka kong D.D Syngai, MCS Additional Deputy Commissioner ka West Jaiñtia Hills District haba ai jingkren kum ka kongsan ha ka jingïalang plie ïa ka jaka ai jingsumar ïa ki nongpang kiba don haki ïing ki sem ne ka ‘Home Health Aide Skill Training’ kala kyntu jur ïa ki samla ‘wat hapdeng ka jingeh jong ka jingkyrduh kam kyrduh jam hapoh ka Ri hi baroh kawei hynrei kum ki samla ki dei ban ïeng hala ki jong ki kjat na ka bynta ban pyndap pynbiang ïa ki jingdonkam’.
Ka la ong ‘haoid ka pyrthei mynta kiba bun na ki samla ki shem jingeh ban ïoh ïa ki kam sorkar hynrei na ka liang ka sorkar ruh ka la wad ki lad ki lynti ban teh lakam ïa kane da kaba pynkhreh ki prokram ai jinghikai bapher bapher ïa ki samla kum ka Meghalaya State Skill Development Society (MSSDS) khnang ba ki samla kin ïoh jinghikai ban ïeng ha ka nongrim ba skhem ïa kaei kaba ki la angnud’.
‘Ym tang ka sorkar wat ki kynhun treimon sngewbha (NGO) kila wan shakhmat ban pynlong kun kine ki prokram ai jinghikai na ka bynta ki samla pule ban ïoh ïa ki jinghikai hashwa ban sdang ïa kano kano ka kam ba ki don jingmut’, la ong shuh shuh ka kong Syngai.
Ha ka juh ka por ka pynpaw ka jingsngewkmem bad ai ka jingïaroh ïa ka Mih-Myntdu Community Social Welfare Association (MCSWA) kawei na ki kynhun seng treimon sngewbha kaba dang ïaid bteng haduh mynta ïa ki kam babha jong ka ha ka imlang ka sahlang naduh ba la seng ïa ka haka snem 1982.
Ka ai khublei kumjuh ïa ki 30 ngut ki samla ki ban shah hikai haka kam ‘Home Health Aide Skill Training’ lyngba ka MCSWA ban ki kin pynleit jingmut bha haka jingshah hikai, da kaba ong ba ka jingsumar ïa ki nongpang ha ki ïing ki sem ka dei ka kam kaba khraw eh bad ka long ruh ka lad ai jingïarap ïa kito ki longïing kiba mad shisha ka jingeh namar ka jingbym don ki nongsumar,
Kala pynsngew ruh ba ka long ka eh haduh katta ban wad ïa ki briew kiba donkam ban ai jingsumar ïa ki nongpang ha ki ïing ki sem, hynrei lyngba ka jingdon kum kane ka jaka ai jinghikai ha Jowai kan long ka jingkyrkhu ïa kiba bun ba lang.
Ka kong Syngai kala kyntu ïa kitei ki samla kiba shimti ban shah hikai ïa kane ka kam kin sa long shisha ki jingkyrkhu ïa kiwei bad “ka jingkyrkhu kaba phi ïoh na ki longïing jong kiba pang ba shitom kan long kaba khraw eh kaba phim lah ban nujor bad ka pisa”.
Kum ki samla ki ban trei ïa kane kam ki dei ban don jingmut jingpyrkhat kaba khlaiñ bad ka mynsiem jingïadei bad ki nongpang, da kaba pynkut ïa ka jingkren ka kong Syngai kala pynkymmaw ïa ki kyntien kiba ong ka ‘jingshakri ïa ki para briew ka dei ka jingshakri ïa u Blei’