Nongpoh, Lber 13: Ban plielad bad ban ai ïa ka rynsan na ka bynta ki khynnah skul ban pynpaw ïa la ki sap ha ka kam ïalehkai sport bapher bapher, nalor ka pule ka puthi kaba ki pynlut por haki saw kynroh jong ki kamra klas, na ka liang ki bor pynïaid skul ka King of Kings Higher Secondary School Mawkyrdep mynta ka sngi ki la plie pyrda noh ïa ka Inter House Athletic Meet 2024 ha madan ïalehkai ka shnong Mawkyrdep.
Ïa katei ka Annual Sports Week la wan ban plie pyrda bad ban ai mynsiem da u Bah Cornelius Laloo uwei naki nongthoh khubor ba rangbah ka District Ri Bhoi kum u kongsan ha ka jingdonlang ka Sister Lily Mary Kharbuki Principal, Sr Wismary Kharbihkhiew, Babu Michael Lyngdoh ki khynnah skul lem bad ki nonghikai jong kane ka skul.
Ha ka sngi plie pyrda ïa kane ka Annual Sport Meet, la sdang shwa da ka jingïaid ïa ka March Pass ba la shimbynta da ki khynnah skul jong ka Red House, Blue House, Yellow House bad Green House, la pynbud pat da ka jingthang ïa ka sharak kum ka dak ban bud thik ïa ki kyndon ïalehkai sport ryngkat ka jingbam smai da ki khynnah skul bad pynphuh phieng ruh da ki jingrwai, jingshad bad mass drill bala shim bynta da ki khynnah skul.
Haba kren kum u kongsan u Bah C Laloo u la ai ka jingïaroh ïa ki bor pynïaid skul jong ka King of Kings Higher Secondary School kiba la shimkhia ban pynlong ïa kum katei ka lympung ïalehkai man la u snem khnang ban plielad ïa kito ki khynnah skul kiba don shisha ïa ka sap ïalehkai ba kin ioh ban pynpaw paidbah ïa kata ka sap bad ruh ban kiew ha kane ka kam ïalehkai sport, nalor ka jingpule jong ki.
U la ong ruh ba ka sport ka hikai shibun ïangi ban heh ban san haka rukom ka ba koit ba khiah, ban pynproh ïaka jabieng bad khamtam ka hikai ban don ruh ka mynsiem kaba khlaiñ ban don ïaka akor ka burom ryngkat ka jingkyntu ruh ïaki khynnah skul ba ki dei ban kiar naki jingmlien bad ki jingdih ba sniew kum u drok, ka kyiad ka shongkha khynnah bad kiwei kiwei lada ki kwah ban poi shaka thong haka jingim jong ki.
