Shillong, Nailar 03: Kumba 7 ngut kiba shong hapoh ka taxi tourist ki la lait na ka jingïap hajan Laitylyngkot kaba ha Pynursla katba ki dang ïaid na shilynter jong ka surok Shillong-Dawki hadien ba u maw u ba heh u la tyllun najrong ka kali jong ki hadien jong ka jingjia twa khyndew ha katei ka jaka.
Kane ka la jia ha ka janmmied jong ka sngi Thohdieng ha ka por kumba 6:35 janmied ha kaba ka kali kaba ki shong kaba la ñiah da u Ajit Deb ka dang wanphai na Pynursla.
Halor kane u Deb, hadien ba u la shem ïa kane ka jingjia ha ka sien kaba nyngkong, u la pynpaw ïa ka jingsngew syier bha hadien ba ma u bad kiba shonglang ki la lait salid na kane ka jingïap. U la ong ba hadien ba u la ïohi ïa u maw uba hab hakhmat ka kali u la ïakhun ban kynriah noh ïa ka kali sha kyndong.
Halor kane la don kiba ïathuh ba kiba ju ïaid na kane ka surok ki ju lap ba ki maw ki shu hab hi ruh hateng hateng ha kane ka surok namar ba mynta ka dang ïaid ka jingpyntrei ban pynheh ïa ka surok bad kane ka buh ruh ka jingma ïa kiba niah arshaka bad ka jingma na ka jingtwa khyndew ïa ki kali kiba ïaid lyngba kane ka surok.
