Hap siew kuna ki doktor MBBS 30 lak, ki Specialist 1 klur lada ym shakri ha jylla

Shillong, Nailur 5 : Ka Myntri ka tnad ka koit ka khiah ka Dr Ampareen Lyngdoh ka la ïathuh ba kito ki doktor MBBS kiba leit pule da ka bhah jongka sorkar jylla kin hap ban siew kuna 30 lak tyngka katba ki Specialist pat 1 klur tyngka lada jia ba kim shakri hapoh ka jylla hadien ba la dep pule bad pyntbit kum ki doktor.
Haba kren sha ki lad pathai khubor ka Dr Ampareen ka la ong “ Lada ki pynkheiñ ïa ki kyndon bad kim wanphai ban shakri hapoh ka jylla ki hap ban siew ïa kaei kaba la pynlut ha ka jingleit pule jongki.Na ka liang ka sorkar pdeng la ïathuh ba ka pynkiew 30 lak na ka bynta kiba pule MBBS bad 1 klur na ka bynta kiba leit pyntbit Specialist kum ka kuna lada jia ba ki pynkheiñ ia ka soskular”.
Hynrei na ka bynta kito kiba wanphai bad shakri hapoh ka jylla ym don jingeh ei ei ruh. Na kane ka daw ka sorkar lyngba ka tnad ka koit ka khiah ka la thaw ïa ka Meghalaya Medical Council (MMC) ban peit ïa kine ki jingeh bad khamtam ka jingduna doktor hapoh ak jylla.
“ Kumba long mynta ki doktor kiba pass MBBS ki leit sha kiwei ki jylla ban ïoh ïa ka License hynrei nangne shakhmat ngi la don la ka jongka Council kumta baroh ki doktor kiba la pass kin hap ban register bad ka Council bad kin ïoh ïa ka license” ong ka Myntri.
“ Tang shu phah pule shabar ka kyrteng ka la rung lypa ha ka list bad kumta hap ban wanphai ban register ha ka MMC ban ïoh ïa ka license bad kane kan long ka jingïarap kaba khraw ïa ka tnad ka koit ka khiah ba kin lah ban bud dien ïa ki doktor” ong ka myntri.
Namar la ïoh jingtip ruh da u nongthoh khubor ba kiba bun kiba pule na ka bhah jongka sorkar jylla hadien ba la dep pule kim ju wan shakri haka jylla kamtam ki bar jylla ne kiba ïoh na ka open category. Nalor kata wat lada pyrshang ban wad shano ki don ne trei ruh ym ju lap dien shuh ïa ki..
Ka myntri ka la ïathuh ba ka sorkar mynta ka la pyrkhing bha bad kan pynshitom ruh kat kum ka aiñ ïa kito kiba pynkheiñ ïa ka jingïasoi soskular.
Da ka jingdon ka Council la lah ban leh ïa shibun ki kam ki don ruh ki kam ba la leh kiba ym kwah ban thad ha ki kot khubor bad kane ka dei ka jingmyntoi ba don ka MMC, ïathuh ka myntri.
La ïathuh ruh ba kiba bun ki doktor mynta ki hap beit ban register bad ka MMC. Lah ban pynkynmaw ba u Myntri Rangbah ka jylla U Conrad K Sangma ha u 2020 u la jubab hapoh ka ïing Dorbar Thawaiñ ba kumba 3.14 klur la ïoh lum kum ka kuna na ki 64 ngut ki doktor ba pass MBBS hynrei ki dang don sa 80 ngut kiba ym pat siew ïa ka kuna.