Nongpoh, Nailar 27: Ka jingther jong u lapbah ba la neh bun kynta mynta ka janmiet ka la wanrah ka jingshlei um kaba jur haka thaiñ Jorabat, Killing bad kumjuh ruh sha ki thaiñ Khanapara haduh ba ki surok ki la kylla long kum ki wah bah bad bun ki kali ki la ngam.
Kum ban shu kdew hangne ka thaiñ Joarabat ka dei kaba ju mad ïa ka jingshlei um na ka por shaka por namar ka jingbym biang ki nala tuid um, hynrei ka jingther u lapbah ka la pynlong biang ïa ki bynta u surok bah khamtam ha khrum jingkieng ha Jorabaat ban tap da ka um haduh ba ki paidbah ki hap ban shu jngi ban jan sha shilliang surok bad bun ki kali ki la sahkut kaba la wanrah ruh ka jingdheng kali kaba jur.
Ka jingshlei bad kylla wah ka surok haka thaiñ Killing bad Khanapara ka la pynkyndit ïa ki paidbah nongshong shnong namar la katta snem kam pat ju don ka jingtuid ka umsaw kaba kylla long kum ka wah heh hynrei mynta ka sngi ym iohi shuh ïa ka dur surok hynrei tang ka umsaw kaba la tuid lyngba kitei ki surok bad buh jingeh ïa ki paidbah ba leit ba wan.
