Hap ring mynsiem ki nongshong shnong da u pum pum ba mih na Weighbridge sorkar ha Nar-ang, Ri Bhoi

Nongpoh, Nohprah 05: Ki paidbah nongshong shnong ka Nar-ang bad Pahammawleiñ kiba shong basah ha jan ka khyrdop khrong khajana ka sorkar (Weighbridge) kaba don ha Nar-ang, ki la hap biang ban mad ïa ka jingeh kaba khraw na ka daw ka jingshah ktah jur na u pum pum ba mih na katei ka khyrdop khrong khajna ka sorkar.
Kum ban pynkynmaw, dang ha u snem ba la dep ki paidbah nongshong shnong, ki khynnah skul bad wat ka seng HNYF, Northern Region ki la mih madan ban pyrshah halor ka jingshah ktah palat ki paidbah na u pum pum kaba la ktah ïa ka koit ka khiah ki paidbah bad kane ka jingïakhih paidbah la siang rong noh ïa katei ka surok ba pynïasoh sha ka khyrdop ha kaba shipor ki la lait na u pum hadien ba la dep siang rong noh ïa ka surok, hyrnei kane kajuh ka jingeh ki la hap biang ban mat mynta u snem hadien ba la poi ka tlang ha kaba na ka jingsniew biang ka surok ka la pynmih pum pum kaba la ktah shisha ïa ki paidbah.
Kumba la ioh lum jingtip, la ong ba na ka liang ki bor ba peit ïa katei ka khyrdop ki ju theh um ïa ka surok tang ha ka por mynstep bad kane ka jingtheh um kam shym la ïarap satia, namar tang da ki kynta ka surok ka la tyrkhong biang bad u pum pum u la dang ban mih biang na katei ka surok sniew.
Halor kane ka jingmih pum pum, ka la ktah ïa ki nongshong shnong ha kaba u pum pum u la rung shaduh sha ïing shet ja bad jaka thiah bad wat ban thad jaiñ ruh ym don jaka shuh, namar u pum pum u la tap ïa ka ïing ka sem bad her sha ki ing ki sem bad kaba kham ma shuh shuh ka long ba ki hap ban ring mynsiem da u pum pum.
Kiba bun ki paidbah ki la khñium bha ïa kane ka jingshah ktah na u pum pum ba mih na katei ka khyrdop khrong khajna ka sorkar ba kim shym la lah ban leh ei ei bad kane ka jingmih pum pum ka ktah ym tang ïa ki nongshong shnong bad ka ktah ruh wat ïa ki paidbah ba leit ba wan ha kaba tang shu poi ha katei ka jaka ki hap ban ring mynsiem da u pum pum ba mih na katei ka khyrdop khrong khajana ka sorkar. ïa kane ka jingshah ktah pum pum la sa khi ruh da kiba bun ki paidbah ba leit ba wan na katei ka surokbah tang shu poi ha katei ka jaka.