Hap leit phai ïing noh ka Qatar bad ka Ecuador, rung suk ka Netherland bad Senegal na ka Group A sha ka Round 16
Doha, Naiwieng 29 : Ka Qatar kaba dei ka kynhun trai jaka kumjuh ruh ka Ecuador ki dei ki ar tylli ki kynhun kiba hap ban leit phai iing noh hadien ba ki la mad ïa ka jingshah rem ha ka jingïakhun kaba lai bad kaba khatduh kaba long ha kane ka janmiet sngi Ba-ar.
Ka jingïakhun ba khatduh na ka Group A ban rung sha ka Round 16 ha ka FIFA World Cup ha ka janmiet sngi Ba-ar ka la long kaba shongshit bha khamtam eh na ka bynta ka Netherland, Senegal bad Ecuador khlem da kheiñ shuh ïa ka Qatar kaba la artatien lypa ban ïohrung hadien ba ka la shah rem ha baroh ar tylli ki jingïakhun kiba la dep shakhmat.
Ha ka jingïakhun pyrshah ïa ka Qatar, ka Netherland ka la pyntikna syndon bad katei ka kynhun trai jaka kan hap ban phai iing noh hadien ba ka la shah thep haduh 2-0 kol ha katei ka janmiet. Ka Qatar kaba la shah rem da 2-0 kol ha ka Ecuador ha ka jingïakhun sdang ka la shah thep biang pat sa 3-1 kol ha ka Senegal ha ka jingïakhun kaba ar bad mynta ka la mad ïa ka jingshah rem kaba 2-0 kol ha ka jingïakhun kaba lai pyrshah ïa ka Netherland.
Haba phai sha ka jingïakhun, u Gakpo u la ïoh ban pynkhih jar tang ha ka minit kaba 26 jong ka kylla step lyngba ka bol kaba la pashat da u Klaassen sha phyllaw kol. Kane kadei ruh ka kol kaba lai na ka bynta utei u khlur ba dang khie ban ïoh thep ha kane ka World Cup.
Ïa ka kol kaba ar jong ka Netherland pat la ïoh ban thep da u De Jong tang ha ka minit kaba 48 jong ka kylla miet kaba la pynshngaiñ syndon ïa ka kynhun ban rung suk sha ka Round 16. Shwa kane, u Klaassen u la pashat ïa ka bol shau Deepay hynrei ka bol ka la wanphai kylla bad kane ka la poi ha u De Jong uba khlem bakla u la ïoh ban pynkiar ïa u Miguel bad Khoukhi bad pynpar suk ïa ka bol sha kol.
Ha ka jingïakhun hapdeng ka Senegal bad Ecuador ruh ka shongshit bha namar ka jingjop ka Senegal kadei ha ka por bym poi pyrkhat. Ka kol ba nyngkong jong ka Senegal ka wan lyngba ka penalty ha ka minit kaba 44. Hynrei tang ha ka minit kaba 67 u Moises Caicedo u la ïoh ban pynïakhaid.
Kaba kham pynitynnad shuh shuh ka long ba tang hadien 2minit tam kata ha ka minit kaba 70 ka Senegal lyngba u Kalidou Koulibaly kapten ka kynhun ka la ïoh ban thep ïa ka kol kaba ar kaba dei ruh ka kol kaba pyntikna ïa ka ban poi sha ka Round 16.