Khliehriat, Jylliew, 30: Kawei ka trok kaba thylli kaba don u number NL01-AF-5925, ha ka por mynstep sngi U Blei ka la hap sha ka riat ha Sonapyrdi, hajan ka Mandir, ka riat kaba jrong ba jylliew haduh kumba 500 phut.
Ha kane ka jingjia watla ka trok ka la pra lyngkhot lyngkhai hynrei u nongñiah jong ka trok u la lait im khlem kano kano ka jingmynsaw.
Ki Pulit jong ka Umkiang Patrol Post kiba la ïoh jingtip ha ka por 9.30 mynstep marmar ki la leit sha katei ka jaka ha Sonapyrdi bad ki la hiar sha riat bad wad ban lap ïoh don mano mano ba dang sahkut hapoh ka kali hynrei ki lap ba ym don mano mano ruh hapoh ka kali bad sha ki sawdong jong ka riat.
Hadien kane, u trai jong ka trok u la pyntip sha ka tnat Pulit ha Umkiang bad ïathuh ba nongñiah jong ka trok u la lait im bad ym shym la mynsaw.
