Shillong, Kyllalyngkot 5 : Mynta ka sngi ka la jia kawei ka jingjia ba sngewsih ha kaba kawei ka Bolero Pick Up kaba kit ïa ki nongrwai Choir jongka Jingiaseng Samla Balang Prebyterian Kynrud kaba dang don ha lynti ban leit sha ka jingïaseng District Mawdem kaba long ha ka Balang Presbyterian Nongrilong kaba hap hapoh ka Mawthadraishan Constituency.
Ha kane ka jingjia kaba la jia ha ka por mynstep bad ba ki trai shnong ki dang ïoh jingtip ha ka por 11 baje ei ei, arngut ki la khlad noh ba kynthup ïa u nongñiah jongka Bolero bad u Choir Conductor katba bun ngut kiwei ki la mynsaw jur. Kiba don hapoh kane ka kali ki don 15 ngut. Napdeng kiba mynsaw don kiba la pynkit sha Kynrud PHC, don pat kiba la pynkit sha Mairang Civil Hospital bad kumjuh ruh sha Shillong Civil Hospital ban ïoh ïa ka jingsumar. Kane ka jaka ba hap kane ka bolero ka dei ha ka jaka ba la tip kum ka Kyllem bad ka dang dei hapoh u pud u sam ka Kynrud hi.Ka daw jongka jingjia ka dei namar ka jingpheil brake ka kali.
