Hap ïaid ki paidbah na surok ïaid kali ba shlei da ki nongdie ha lynti ïaid kjat

Shillong, K’ Lyngkot 19: Katba nangmih ki sngi la ïohi ba ym tang ka Ïewduh, ka Bimola bad ka Khyndailad kaba la khapngiah bha na ka daw jong ka jingbun ki briew bad khamtam kiba die tiar ha madan, hynrei mynta katba nangmih ki sngi la ïohi ba wat ka thaiñ Ïew Mawlong shaduh ka jaka ïeng kali Jowai lah dap da ki nongkhaïi bar jylla.
Ha kane ka jaka la ïohi ruh ba wat ki paidbah ki la mad ïa ka jingeh ha kaba ïadei bad ka ïaid ka ïeng na kine ki lynti ïaid kjat.
Kine kiba khaïi hapoh ka thaiñ Ïew Mawlong shaduh jaka ïeng kali Jowai kidei kiba die syndon ha ki lynti synkien bad kane ka rukom die kadei ruh kaba la pyndik shibun bha ïa ka ïaid ka ïeng ki paidbah ha kaba la ïohi ba bun na ki paidbah ki la hap ban ïaid noh na ka surok ïaid kali.
Shisien ba la thied jingthied ki briew na kine ki bar jylla ba khaïi ha lynti ïaid kjat, ka mut ba ym lait shuh ban ïaid lynti ki briew bad la hap shu ïakyrshut para briew, sngewleh raiñ ruh haba poi ban hap ïakyrshut bad ki kynthei briew ne ki longkmie.
Kumta la ïohi ba bun na ki briew kiba ïaid na kine ki lynti ïaid kjat la kidei kiba dang kiew ne ki dang hiar ban leit sha la ki jaka ba ki donkam ki la jied noh da kaba shu hiar na ki lynti ïaid kiba ïaid da ki kali.
Kumba la ju ïohi manla ka sngi, ka surok Ïew Mawlong kadei ka surok kaba khapngiah bha naba kadei ruh ka surok kaba don bun ki jaka ïeng kali shnong bad kymjuh ruh don pat sa kiba die madan ha baroh arliang jong ka surok.
La sngewthuh ba kine kiba shong madan kidei ruh ki bym don satia ïa ki laisen khaïi bad ki la shu ïadie ïa khaïi ïa ki tiar da kaba beaiñ khlem pyrwa ne don jingtieng eiei.
Katba ki bor jong ka aiñ ki dang lyngai ha ka ïohthiah kine ki jaka suki suki kin sa dap smam da ki briew kiba nabar bad yn ym lah shuh syndon ban kyndang ïa kine bad lada ki bor ka aiñ ruh ki kyndang khlem pep kin sa leit beit sha Ïingkashari khnang ban ïoh syndon da ka jaka kaba biang na ka sorkar jylla.