Dang ha kine ki khyndiat bnai la ïohi ba ki don bun bha kiba la ïoh pang bad don ruh kiba la khlad noh na ka daw ka jingbam ïa ki tit khlaw. Kane ka jingduh ei ki mynsiem briew ka la buh ruh ïa u dak jingkylli uba heh bha ha ki paidbah ba kumno ki tit kiba ki paid Khasi naduh hyndai ki ju kheit ban shet jyntah mynta pat un kylla long bih.
Tangba ym lah pat ruh ban tip ïoh lehse kane ka pateng mynta ïoh kim ithuh shuh ne ïoh ki bakla ïa ki tit buid bad ki tit bam namar lada ym peit bha hi kan eh shibun ban lah pynïapher hapdeng kine ar. Kaba kham sngewsynei ka long ruh ba tang na ka daw ka jingbakla kheit bad bakla shet ki kmie ki kpa ki khunlung ba rit kumjuh ki heprit ki la shu kylla long ki lanot ha kane ka jingjia.
Kumta ka long ruh kaba donkam ïa ka tnad ka Koit ka Khiah kumjuh ïa ka tnad ka Rep ka Riang ba kin mih paidbah ban pynshai halor kane. Ka tnad ka dei ruh ban leit kylleng ki jaka ban pynshai paidbah ruh ha ki lad pathai khubor khnang ba ka jingpyntip kan poi sha baroh ki kyndong kynshrot jong ka jylla.
Katkum ka jingïathuh da u Asst. Director ka tnad Horticulture, Mushroom Development Centre, Upper Shillong, Bah K Kharpran la ong ba naduh hyndai ki mei tymmen pa tymmen ki la hikai bad kdew kiba kumno ki tit kiba long ban bam bad ki bym long ban bam. Tangba la ong ba mynta pat ka la don noh ka jingdkoh ban tip ïa ki tit ba long bam bad kino bym long ban bam.
Kine ki riewshemphang ki la ong ruh ba ïa ki tit ba ju boi ki khniang ne ki wieh kidei ki tit ba long ban bam nalor ba ki don ka jingsma iwbih bad kito kiba don jingat ne kynja sati ha kito ki tit ka pyni ba ki long bih. La ïathuh ruh ba kito ki tit ba long bih ki kham phalang katba kito ki ba long bam ki kham dum rong. Watla katta u ong ba kam long satia pat kaba shngaiñ ba shu kheit madei mata khlem da tip tikna. La ïathuh ruh ba ki don haduh kumba 18 – 20 tylli ki jait tit kiba long bad shngain ban bam kum u tit thnaw syiar, tit lbong hati, tit dud, tit sia bad kiwei kiwei.
Kumta kumba ong ki riewshemphang ki paidbah ki dei ruh ban husiar namar ki don ruh ki jait tit kiba sniew kiba syriem kum ki tit ba long bam bad kumta hap ban long husiar bha haba leit ban kheit tit sha khlaw sha btap. La pynshai ruh ba khnang ban lait na ka jingsyier bad ban lait na kaba bam ïa ki tit buid bad tit ba long bih, na ka liang ka Mushroom Development Centre, ki pynshlur ïa ki nongrep ba kin phai khmat ruh ban rep tit (tit farm) ha ki iing ki sem, la ka long ban bam hi ïa lade ne ban die, namar ka kam rep tit kam dei kaba lut shibun ka pisa lane kaba bam por.
Lah ruh ban kdew hangne ba dang shen, na ka liang ka ophis treikam jong u Director ka tnad ka Koit ka Khiah ka jylla ka la kyntu ïa ki paidbah ba ki dei ban kiar na kaba bam ïa ki tit khlaw ha ka por slap. La pynshai ruh ba ka jingbam ïa ki tit khlaw ka long kaba ma shibun namar don ki tit kiba don ïa ka bih kaba lah ban pynïoh pang bad ktah ruh ia ka jingim. Ka State Surveillance Unit jong ka Integrated Disease Surveillance Program (IDSP) ka la lap ba kum kine ki jingjia ki kham jia ha ki bnai slap naduh u Jymmang haduh u Risaw.
Shuh shuh la batai bniah ruh ba kito kiba ïoh pang na kaba bam ïa kitei ki tit khlaw ki ïoh ïa ka jingpang sniew kpoh kum kaba kynroi, prie, pang ki dohksah. La ong ruh ba ha kito kiba kham jur, ka don jingmih syep, kren ruma, ym tip briew bad sniew u dohnud.Kumta, na ka liang ka tnad ruh ka ïai ban biang ba lada ym tikna hi dei ban kiar lai-lum lai-wah ban bam ïa ki tit khlaw bad ban tip ruh nangno kheit namar ïoh ki tan ïa ki kynja bih na ka mariang.
