“Lada ki briew jong nga, ïa kiba la khot da ka kyrteng jng nga, kin pynrit ïa lade, bad kin duwai, bad kin wad ïa ka khmat jong nga, bad kin phai noh na ki lynti bymman jong ki; Kumta te ngan sngew na bneng, bad ngan map ïa ki pop jong ki, bad ngan pynkhiah ïa ka ri jong ki. Te ki khmat jong nga kin peit, bad ki shkor jongnga kin sngap ha ka jingduwai ka ban pynlong ha kane ka jaka”.
Ïa kane ka ktien la sot la ka Bible: 2 ki Khronikl 7:14-15. Ka Jaidbynriew kaba rit bad ba tang shi troh, kat kum ka snem thoh kyrteng u 2011 na ka 29.67 lak ki nongshong shnong ka jylla tang kumba 14.50 lak ki dei ki Khasi-Jaintia bad kiwei pat ki dei ki jaitbynriew khleh bapher bapher.Wat la kam shymla don kano kano ka jingpynbna ne declaration, hynrei bun ki tip Ïa kane ka jylla kum ka Jylla Khristan, namar ba khambun ki dei kiba ngeit ha u Khrist.
Haba peit shisha ïa ka jingbun paid, lah ban ong ba kam long kaba lah ban ïaleh pyrshah ïa kiwei pat ki jaitbynriew kiba heh paid bad ym dei tang kattei, ki dang don ruh kata ka jingiadei bad kiwei pat ki para jait jong ki kiba im shabar jong kane ka jylla jong ngi. Kiwei ki jait bynriew kiba im ha kane ka jylla jong ngi ki dei hi ki jait bynriew heh paid jong ka ri India kumta ha ba don kano kano ka jingktah ia ki ka ktah ruh ïa ngi ki rit paid kiba dang pyrshang ban sdang ïa ka jingim ha ka jingrtrei jingktah, ka jingpule, ka khaiï pateng sha kiwei pat ki bynta bad jylla ka ri India. Da kaba ong kumne kam mut ba ngi theh umpjah ïa ka dohnud ba shitrhem ba ieit jaidbynriew jong kiba bun, hynrei ka long ba ngin lah ban kham puson kham jylliew bad bishar bha ïa kiei kiei da ka jingshemphang khnang ba kan pyllait na ki jingeh ha kiba bun ki liang bad buh ruh ïa la ka jaidbynriew ha ka jingshngaiñ.
Ym lah ban len haba ngi peit ïa ka jingroi shaphrang ka jylla jong ngi bad khamtam ka jaidbynriew Khasi, hato kam dei mo ba ka roi ka par ka mih na kata ka jingïa im khleh bad kiwei pat ki jait bynriew bad ngi ïoh shibun ki jinghikai ban im ïa ka jingim ba trei shitom bad ïabeh sha ka thong. Ngi ïoh jinghikai shibun eh ban ïohi ba haba bun napdeng jong ngi shisha ngi ïa-ud ba ym don kam don jam ne ym ïoh jingtrei, hynrei kiwei pat ki jait bynriew ki wan sha kane ka jylla jong ngi ki ïoh jingtrei jingktah bad ha khmat jong ki kane ka jylla jong ngi ka dang dei ka Paradais, khamtam nalor ba ka don ïa ka mariang kaba pynngad bad ki briew kiba bha bad ba sbun. Kumta bun na ki bar jylla kim kwah shuh ban phet na kane ka shnong jong ngi. Ngim lah khlem sngewnguh ïa ka sorkar kaba la buh ïa ka ain kaba skhem kaba la khanglad ïa ki bar jylla ba kin lah ban thied duh ïa ki jaka jong ngi lyngba ka Meghalaya Land Transfer Act.
Hynrei kat kum ka jingiaid ka por pat ngim lah ban len bad ka jingïoh lad lyngkar khlem pud jong ki briew kiba nabar ban bsut khlieh sha kane ka jylla bad ka ri ba ieit jong ngi, ka la pynlip noh ïa ka rong jong ka burom Khasi jong ngi ha ka jingsbun, ka jingbha bad kane baroh ka jia na kaei kaba ngim lah ban len kata ka dei ka jingbieij bad ka jingailad palat jong ngi hi baroh. Naduh ha ki shnong ki thaw haduh ka trei ka ktah ngim shym la buh shuh ïa u pud hynrei la ai laitlan haduh ba la i lyngkar haduh katta katta bad la pynlip syndon ia ka rong bad ka burom jong ka jylla jong ngi khamtam ia ka nongbah Shillong kaba la tip kum ka Scotland of the East. Naduh ka khyndailad kaba dei ka dohnud bad ka khmat jong ka Nongbah la i kum ka jaiñjot rynjaiñ ym lah shuh ban da burom la jyllei da kiei kiei ki bymitynnad shuh !
Hooid, shisha hato kam pat dei mo ka por ïa ka jaidbynriew ban kylla kaba mut noh na kaba kwah im suk than bad khwan lalot? Kam dei shuh ka juk hiarthma kum hyndai, hynrei ngi donkam ïa ka jingstad bad ka jingshemphang kaba tang u Blei u lah ban iarap iaka jaidbynriew. Kane ka long ka bynta jong kita kiba la khot ha katei ka kyrteng ban ïai ïasaid lem na ka bynta ka jylla bad baroh kiba sah ha ka.
