Shillong, Nailar, 26: Ka Jan Arogya Samiti (JAS) jong ka HWC-Sub-Centre Laitnongkseh ha ka 22 tarik mynta u bnai ka la pynlong ïa ka jingpynsngewthuh paidbah halor ka phang ka jingktah na ka shongkha khynnah (Teenage pregnancy), ka aiñ POCSO Act, halor ka jingpang HIV/AIDS bad kumjuh ruh halor ka jingkyrni ha ki jingdih pynbuaid ha ka shnong Laitnongkseh.
Ha kane ka sngi la ïashim bynta da ki skul bapher bapher jong ka thaiñ kiba kynthup ïa ka Wahnongkseh Upper Primary School, ka Laitnongkseh Upper Primary School bad ka Mawkahiar Secondary School. La ïashim bynta ru da ki SHG bad ki Village Organisation jong ki shnong kiba mar jan.
Ki nongkren ba kyrpang ha kane ka sngi ki kynthup ïa u u Block Programme Manager Bah W. Kharpran uba la kren halor ka jingtreikam jong ka JAS, ka VHC bad ka jingdon bynta kine ha ka imlang sahlang.
La ïoh ruh ïa ka jingkren na Officer i/c jong ka Sohiong Police Output u Bah A. Shanpru uba la pynshai halor ka aiñ kaba tehlakam ïa ki kam thombor ïa ka longrynïeng jong ki khyllung khynnah kaba tip kum ka POSCO Act.
Ka jingpynsngewthuh ïa ki khynnah samla, longkmie longkpa ba kim dei ban shongkha khynnah bad ba kim dei ban pynshlur ban shongkha khynnah namar kane ka long kaba beaiñ bad kaba lah ban ngat ha ki jingpynshitom ba pyrkhing jong ka aiñ.
Ha kajuh ka por, u Bah A. Shanpru u la kyntu ruh ba ym dei ban thombor ïa ka longrynïeng jong ki khynnah bad kiwei kiwei ki jingpynshai kiba ïadei bad ka tei ka aiñ.
Ka Kong P. Nongkhlaw (PHN) iba dei i nongtrei jong ka Sohiong CHC ka la pynshai halor ka jingeh jingmynsaw na ka jingshongkha khynnah bad jingarmet ha ka por ba dang rit ka rta.
U Bah J. Pohtam uba la mihkhmat ïa ka Meghalaya AIDS Control Society (MACS) bad ka kong G. Jyrwa ki la ai jingpynshai halor ka jingpang HIV/AIDS bad ka jingma na ka jingdih ïa ki kynja jingdih pynbuaid bad u drok.
La pynshong shit ïa kane ka prokram da ka jingrwai na ki khynnah skul jong ka Wahnongkseh Upper Primary School bad ka jingshad Zumba na ka kong L. Majaw (MLHP) bad ki paralok.
Ha kane ka sngi la don lang ruh ki dkhot jong ka Executive Dorbar jong ka Shnong Laitnongkseh kiba kynthup ïa u Rangbah Shnong jong ka shnong Laitnongkseh u Bah Diber Shabong, uba long ruh u Chairman jong ka JAS, u Secretary Shnong Bah Dhotdingstar Nongbri, Assistant Secretary Shnong Bah Purningstar Shabong kiwei kiwei.
