Halor ka jingjia ha Umtyngar hap ïakren ki ar jylla ïa ka jingeh, ong ka AASU bad KSU

Shillong, Naitung 27: Haba pynpaw ka jingsngewkhia halor ka jingkhang ïa ki kali tourist kaba la jia ha ka sngi Thohdieng kiba wan Assam ban rung sha Meghalaya, ka All Assam Students Union (AASU) bad ka Khasi Students Union (KSU) ki la kyntu ïa ka sorkar jong baroh arjylla ban rai ïa kane ka jingeh lyngba ka jingïakren.
“Ki nongjngohkai bad ki kali kiba kit ïa kiba wanjngohkai na Assam sha Meghalaya ki la shah pynsangeh ha Umtyngar khlem tip ïa kano ka daw ne ka jingjia eiei, hynrei kadei pat kaba donkam ïa baroh artylli ki jylla ka Assam bad Meghalaya ba kin don ka jingïakren halor kane ka kam bad ban shim ka rai kaba neh shyrta,” ong u President ka AASU u Utpal Sarma, bad u general secretary u Sankor Jyoti Baruah bad u President ka KSU u Bah Lambokstarwell Marngar, bad general secretary u Bah Donald Thabah ha ka jingïakren ha ka sngi Saitjaiñ.
“Kumjuh ruh ki seng jong tourist taxi association na baroh artylli ki jylla ki la kyrpad ban don ka jingïadei kaba bha bad ka mynsiem jong ka jingïasngewthuh lang. Ka KSU kan shim khia ïa kane ka kam,” ki la bynrap.
Baroh artylli ki seng samla pule ki la ong ba ka Assam bad Meghalaya ki la long artylli ki jylla ba marjan. Ka la dei ka kam jong baroh artylli ki seng ka AASU bad ka KSU ban pynkhlaiñ ïa ka jingïadei hapdeng paralok ki nongshong shnong ka Assam bad Meghalaya naba baroh ki jylla ki la mad ïa ka khlam jong kajuh ka jingeh na ka jingwan rung kyrthep ki mynder ri.
“Ka AASU bad KSU ki la ju kyrshan lang barabor haba donkam pynneh pynsah ïa ki trai ri trai muluk bad ka jingpynsah ha kane ka jylla naduh ba la kha ïa kine ki artylli ki jylla. Ngin ïaibteng ban leh ïa ki kam kiba ïada iwei ïa iwei pat,” ki la ong.
“Baroh ar seng ka AASU bad KSU ki la pynpaw ka jingsngewthut ban sakhi ba ki kali kiba kit ïa kiba wanjngohkai na Assam, kumjuh ki kali shimet bad ki kali kamai, ki la shah pynsangeh bad shah phah pynphai noh ha kiba bun ki jaka ha Meghalaya bad ki la shah khang ban rung sha ka jylla. Hapoh ka shatri jong ka North East Students Organization (NESO), ka AASU bad KSU ki la ïasyllok ïa kane kam ha kata ka rukom kaba dei ban shim khia noh kloi. Haba ïakren ïa kane kajuh, ka KSU ka la ong ba kam shym la tip ba don kino kino ki jingjia ba shah pynsangeh ki kali na Assam bad kam don bynta ha kum kane ka kam,” ki la bynrap.