Haduh katno ngi ñiewkor ïa ka Ktien lajong?

Kane ka long ka jingkylli kaba yn hap ban kylli ïa ki longdien mandien ha kane ka juk ïatynneng bad ka juk ïabeh ïa ka kolshor jong kiwei pat ki jaidbynriew. Wei ba la duh ka ktien, ka jaidbynriew ruh ka ïap. Ha kane ka juk ïatynneng, kham niar ban iohsngew hapdeng ki samla ba kin ieid ban kren pura ïa ka ktien lajong khlem da pyndonkam ïa ka ktien Nongwei (English) hynrei manla ka por ba ki kren, kaba bun ka dei ka ktien Phareng ban ïa ktien tynrai lajong. Ki samla lud ha kane ka juk yn lap ruh ba kim mon hi ruh ban kren ïa ka ktien Khasi hynrei ki kham sngewtynnat ban krne ïa ka Khalish.
U Phareng mynba u wan kiew sha kine ki rilum Khasi ban bet ia u Symbai jingngeit Khristan u angnud bad u thrang ban nang ïa ka ktien Sohra kaba la kren salonsar da ki khun Khasi kiba shong ha rilum Khasi bad ngin lap ruh ba wat ki Kot ba la pynrung ha ki skul pule ba la thoh da ki mishoneri na shilliang duriaw ki da long shisha kiba kynsai bad kiba kit jingmut bad kiba don ruh wat ïa ka jingsneng ïa ka jaidbynriew Khasi. Hynrei ka long pat kaei kaei kaba sngewsih ban iohi bad ban iohsngew ba ki samla ha kane ka juk kim don shuh kata ka mon ba kin nang ban kren ban tih ïa ki kyntien tynrai.
Ka jingpynbna ka UNESCO ha ki snem baladep ba ka ktien Khasi ka lah ban duhjait noh na kane ka sla pyrthei namar ba la duna kiba kren ïa kane ka Ktien ka la buh jingma haduh katta katta ïa ka jaidbynriew Khasi kaba don tang shi troh.
Ka jingmih shakhmat ka SBUK Khasi Learning Centre ba la pynïaid da ka Seng Biria u Khasi ka ladei ban pynkyndit bynriew balei ka la seng ïa kane ka shlem ai jinghikai ïa ki dak thoh Khasi sha kiwei pat ki jaitbynriew ki bym dei ki Khasi kiba wan buhai shnong ha kane ka Jylla.
Ka jingweng noh ka Meghalaya Board of School Education (MBoSE) ïa ka sobjek Khasi kum ka Compulsory Subject ha ka 10+2 ka la pyndiaw ïa ki paidbah nongshong shnong ka jylla hynrei ka sorkar ka la set bthing ïa ka jingsngew pyrshah ki trai ri trai muluk pynban ka la pynksan beit ba ka jingweng noh ïa ka Khasi na ka kyrdan Compulsory Subject hana ba kam don jingmut eiei ïa ki samla pule.
Ka jingïaksaid ki riewproh jabieng ba iohi jngai ïa ka jingdonkam ban pynrung noh ïa ka ktien Khasi ha ka Eight Schedule kan ym don jingmut satia lada ka jaidbynriew Khasi Pnar kim ieid ïa la ka jong ka ktien tynrai.
Kawei ka jingeh kaba ka jaidbynriew ka ïakynduh ha kaba ïadei bad ka ktien ka thylliej ka long namar ka jingïakynduh ïa kiwei pat ki jaidbynriew ha kaba yn hap ban kren da ka ktien phareng. Hynrei kane pat kam mut ba ki samla Khasi Pnar kin klet noh ïa la jong ka ktien tynrai. La ju lap ruh ba ki don ki khynnah skul kiba tang shu la wan kiew sha Sor Shillong ban bteng ïa ka jingpule jong ki, ki lehrain wat ban kren ïa ka ktien shnong tynrai jong ki.
Ka por ka ladei ïa ka Khasi Author Society kaba long ka kynhun ki proh jabieng bad ki khraw pyrkhat ïa kano kano ka kynhun ba don jingkitkhlieh ïa la jong ka jaidbynriew ba kin phaikhmat lem noh sha kane da kaba thaw ïa ki lad ki lynti kumno ban bsiap bad bsut ha ka jingmut jong ki samla Khasi Pnar ba kin sngewthuh ïa ka jingkordor bad ban ieid ïa la ka ktien lajong.
Shiban sngew shngaiñ ka mynsiem ban ïohsngew ïa ki riew shemphang kiba ïai long kiba peitngor bha da kumno ban lah ban pynneh ne ban pynsah ïa la ka jong ka ktien ka thylliej, ki da trei borbah ruh na ka bynta ban sam lem ïa jingnang ka jingtip ka jong ki sha kiwei pat, khnang ba ka ktien kan ïaineh ïaisah, pynban hapdeng ka jingtrei bajarjar, dang bun pat kiba ibeiñ ïa ka ktien lajong. Hato don mo ka buit sianti jongno re ban pynthame ne ban sait khuid na ka jabieng ban kynther jymbuiñ noh shi syndon ïala ka jong ka ktien…? Ban ïoh ia ka jubab jong kane baroh ka shong ha man uwei pa uwei na ki paid Khasi baïar ba kin ïathir ïawoh ne ban wad ïa ka daw tynrai.