Shillong Naitung 15 : U Executive Member ba khmih ïa ka Council Building u Bah Rangkynsai Kharbuki u la ïathuh hapoh ka Ïingdorbar Lyuir ka KHADC kaba dang shu dep shen ba ka Ïew ha Laitlyngkot, Bynihat bad Mawryngkneng la dep ban tei, katba ka Riangdo Market Complex la pyndep kumba 90% bad ka Riangdo Market Complex ynsa pyndep hapoh jong u bnai Nailar mynta u snem.
Ïa kane u la jubab ïa ka jingkylli ba la wanrah da u MDC ka Mawkynrew u Bah M N Mukhim uba la kylli ïa ka jingtei ki Market Complex ha Laitlyngkot, Bynihat, Riangdo bad Mawryngkneng ba la mang na ka Excluded Areas Scheme 2019-2020 bad ka 15th Finance Commission Grant 2020-23 halor ki jingtei ïa kitei ki ïew. U Bah Mukhim u la kylli ruh ïa ka jingïamynjur ha shwa ban tei ïa kitei ki Ïew.
Halor kane u EM u la ong ba ka bynta jong ka tnat Building ka long tang ban shu shna na kaba la mang hynrei na ka bynta ka jingïateh kular ne shim wai kadei ka bynta jong ka tnat Market bad khlem pep shwa ban tei kan don beit ka jingïateh kular haloe kane ka kam.
Haba batai bniah ïa ki jingmang pisa ïa ki ïew u EM u la ïathuh ba ka ïew Laitlyngkot kaba la mang ha u 2018-19 ka long T. 25 lak, Bynihat 2018-19 ka long T. 30 lak bad ka Mawryngkneng 2019-20 ka long T. 70 lak.
Halor ka jingpynïaid ïa ka ïew ha Mawryngkneng bad Riangdo u EM u la ïathuh ba kitei ki hab ha ka jingpeit ki shnong.
