Haduh 9 tylli ki Coke Plant be-aiñ pynpra ki bor synshar ka East Jaiñtia bad West Khasi Hills
![](https://mawphor.com/wp-content/uploads/2023/07/IMG-20230712-WA0041.jpg)
Khliehriat/Nongstoiñ, Naitung, 12: Ki bor synshar jong ka East Jaiñtia Hills District kiba la pyntreikam ïa ka hukum jong ka Iingbishar Meghalaya High Court ha ka sngi Balang ki la pynpra haduh 9 tylli ki Coke Plant ba la shna beaiñ.
Katkum ka jingtip ba la phah da u Deputy Commissioner jong ka East Jaiñtia Hills District u Abhilash Baranwal, ïa ki ar tylli ki Coke Plant beaiñ lane ki karkhana saiñ dewiong ba la shu tei beaiñ la pynpra namar ba kim shym la ïoh ïa ka Consent to Establised (CTE) na ka Meghalaya State Pollution Control Board (MSPCB).
Ki ar tylli ki Coke Plant ba la shna beaiñ ki dei kiba la tip kyrteng kum ka M/s Halari Coke Plant bad ka M/s Shauryansi Coke, Wah Samsier, Elaka Sutnga. La pynpra ïa ki ar tylli ki Coke Plant beaiñ hapoh ka jingpeit jong u Additional Deputy Commissioner ka East Jaiñtia Hills u Bah J. Shylla, kynthup ruh ki nongmihkhmat na ka ophis u Superintendent of Police ka East Jaiñtia Hills, na ka Meghalaya State Pollution Control Board (MSPCB) bad na ka District Commerce and Industries Centre.
Ïa kine ki Coke Plant beaiñ la pynpra da kaba pynbthei da ki bom. Ïa ka M/s Halari Coke Plant la pynbthei ha ka por 12:00 baje mynsngi katba ïa ka M/s Shauryansi Coke, Wah Samsier, la pynbthei ha ka por 3:30 baje nohphai sngi.
Ha ka jingpynbthei ïa kine ki ar tylli ki karkhna saiñ dewiong ym shym la don mano mano ruh ba mynsaw bad ka jingbthei ïa ki Coke Plant beaiñ kan dang ïai bteng.
Ha West Khasi Hills, ka jingpynpra ïa ki Coke Plant beaiñ da ki bor ka West Khasi Hills ha thaiñ Shallang ka la kiew mynta sha ka 7 tylli bad ki Pulit ki la kem haduh 6 ngut ki trai karkhna kat haduh ba thoh ïa ka khubor.
Mynta ka sngi Balang, ki bor synshar District ki la pynpra biang sa lai tylli ki karkhana beaiñ da kaba pynbthei da u bom ïa ki otoskhana haduh da pra hi phom. Kine ki dei kiba don ha ka thaiñ Kyllonmathei, Shallang.
Ki Heh Pulit ki pyntip ruh ba ka jingkem ïa ki trai jong ki Coke Plant beaiñ ka la kiew sha ka 6 ngut da ka jingïohkem biang sa uwei u trai.
U Deputy Commissioner jong ka West Khasi Hills Bah Garod LSN Dykes, ula pynjari da ka kyndon 144 CrPC ba mana ïa ki riew paidbah ba kin ïatur shajan ki Coke Plant ba beaiñ katba dang ïaid ka jingpynpra ïa ki atoskhana jong ki karkhana beaiñ.
Ïa kane ka hukum la pynmih naduh ka 11 tarik Naitung bad la pyntreikam mar dor ha ka thaiñ.
Katkum kane ka hukum, u Deputy Commissioner u la bthah ban pynpra lut ploiñ ïa ki karkhana coke ba beaiñ kat kum ka Order Memo No. NDG 304/2020/Pt11/79-A dt. 02/02/2023. La ong ruh ba ka Sorkar Meghalaya kala ai jingmynjur ban pynpra ïa ki atoskhana jong ki Coke Plant beaiñ ha ka District kat kum ka shithi FOR 2/202/302 dt.4/7/2023.
Halor kane, la bthah ban pynpra ïa ki Coke Plant beaiñ hapoh ka District kaba sdang naduh ka 7 tarik Naitung 2023.