Haduh 46 ngut ki nongïalehkai ba kynsai ka jylla pynkup burom u Myntri Rangbah

Shillong, Nailur 08 : Ki la don haduh 46 ngut ki nongïalehkai na ki jingïalehkai bapher bapher kiba la shah pynkup burom ha u Myntri Rangbah ka Jylla, Conrad K Sangma ha ka prokram ‘Achiever of the Month – Sports Edition’, kaba la pynlong ha Shillong ha kane ka sngi Ba-ar.
Ha kane ka prokram, ka samla Sanfida Nongrum ka la shah pynkup burom kum ka ‘Achiever of the Month’ ha ka Sports, namar ki jingjop jong ka bad ka jingnoh synñiang kaba khraw sha ka kynhun ïalehkai phutbol ka Ri mynta u snem.
Haba kren ha kane ka jingïalang, u Myntri Rangbah u la ong ba ka thong jong ka ‘Achiever of the Month’ ka long ban ithuh ïa ki jingjop jong ki nongshong shnong kiba trei bad noh synñiang ha ki bynta bapher bapher.
“Ka thong jong kane ka prokram ka long ban ithuh, ban kyrshan, ban sngewthuh, ban pynshlur bad ban ai jingïaroh ïa ka jingtrei shitom jong ki briew jongngi,” u la ong.
U Myntri Rangbah u la ong ruh ba ka Sports ka long ka bynta kaba kongsan bha ïa ka Sorkar bad ka Sorkar ka la pynkiew ïa ka mang tyngka bad ka jingbei tyngka ha kane ka bynta.
Haba kren shaphang ka jinglong jong ka Sports ha ki snem kiba mynshwa, u la ong, “Ha ki snem kiba mynshwa, ka Sports ka la ïakynduh bun ki jingeh bad ki jingeh ruh ki don bun bha. La ïohi ruh ïa ki synjuk ïalehkai (sports association) ki la pynïaid ïa ki kam jong ki da ka jingieit bad ka jingsngewtynnad ïa ka Sports, hynrei ka jingïarap na ka Sorkar ka long kaba rit ne ym don.”
U la ong ba ka Sorkar ka la lah ban pynbeit bad pynïaid beit ïa katto katne ki jingeh ha ka tnat Sports, da kaba pynlut ym tang ha ki jingtei ïa ki jaka ïalehkai ha kylleng ka jylla, hynrei ka la kyrshan ruh ïa ki sports association, ki coach bad ki nongïalehkai.
“Ka Sports Policy jong ka jylla kam dei tang ka policy document, hynrei ka long ka vision document kaba ïarap bad ïalam ïa ngi ban ïaid shakhmat bad ban poi sha ki thong jong ngi,” u la ong.
U Myntri Rangbah u la pynpaw ruh ïa ka jingkut jingmut jong ka Sorkar ban kyrshan ïa ki samla jong ka jylla.
“Baroh ki prokram kiba ngi don, bad ka pisa kaba ngi pynlut, kam dei tang ka jinglut hynrei ka long ka jingbei tyngka ha ka lawei jong ka jylla jong ngi, kaba dei na bynta ki samla jong ngi,” u la ong.
Haba ai jingïaroh ïa ki nongïalehkai, u Myntri Rangbah u la ong ba ka Sports kam dei tang ka jingïoh khur takma ne ka jingïoh nam. “Ka Sports ka dei ka rukom im, bad ka jingïaid lynti jong phi kam kut hangne. Nga kyntu ïa phi ban long ki nuksa ïa kiwei pat,” u la ong.
Ha kane ka prokram, u Myntri Rangbah u la ïakren ruh bad ki nongïalehkai, ki coach bad ki nongmihkhmat halor ki jingdonkam jong ki. La ïakren ruh halor ka jingïarap ïa ki nongïalehkai ban shim bynta ha ki jingïalehkai National bad International bad halor ki jingkyrshan na ka bynta ki nongïalehkai kiba khur takma.