Haduh 4000 tylli ki longïing ba duk ban ïoh skim FOCUS ha Mawkynrew, pynbna u DyCM

Shillong, Risaw 30 : Ki don haduh 4000 tylli ki longïing baduk jong ka Mawkynrew constituency kiban ïoh ïa ka skim baduk lyngba ka skim FOCUS jong ka sorkar jylla, pynbna u Myntri Rangbah bad Symbud Myntri Rangbah ha ka jingïalang jong ka NPP kaba long ha Jongksha ha kane ka sngi Saitjaiñ.
Na ka liang u Myntri Rangbah ba dei ruh u National President ka party haba kren ha katei ka sngi u la ong ba lyngba katei ka prokram jong ka sorkar, la mang ban ai 5000 tyngka marwei bad 5000 tyngka pat sha ka Group kaba ki don bad kane ka jingai kan kynthup lang ïa ki nongshong shnong ka Mawkynrew constituency ruh.
Ha kajuh kapor u la pynshai ruh ba ki la don bun kiba pynsngewthuh bakla ba katei ka jingai jingïarap sha ki nongrep ba kadei ka ram bad ba ka sorkar kan sa phah siew ïa ki. “Nga pynshai shaphi bad kane kam dei satia ka ram bad phim donkam ban pynphai ïa kane ka pisa namar ngi sam khnang ban kyrshan ïa ki nongrep. Kumta ban ong ban pan biang ïa kane ka pisa kadei ka bym dei satia,” u la ong.
U Myntri Rangbah u la ong ruh ki don ka jingkyrmen ba da ka jingkyrkhu u Blei kin lah ban wan biang ha ka bor synshar bad kin lah ban ïarap noh man u snem sha ki nongrep bad ki long ïing ba duk lyngba katei ka skim.
Haba ïadei pat bad ka surok kaba la sniew palat ha Jongksha kumba la kyrpad da u Bah Kansing kyrtong ka NPP na katei ka thaiñ, u Conrad u la ong ba kin sa sdang noh shen ïa ka kam.
Shwa kane haba batai bniah halor katei ka skim, u Bah Prestone u la ong ba na ka bynta ka Mawkynrew ki la aiti ha u Bah Kansing ban peit bad jied ïa ki longïing kiba kham duna ka ïoh ka kot la kumno kumno 4000 tylli ki longïing.
“Kaba nga sngewtynnad ka long ba imat ki la jan dep ïa kata. Mar ïa dep kadei sa ka kamram jong ka sorkar ban pynpoi ïa ka jingïarap sha kito ki account number kiba la ai lyngba ki nongïalam jong u Bah Kansing. Kumta wat tieng, u Myntri Rangbah bad u Symbud Myntri Rangbah ki don hangne,” la kyntu u Bah Prestone ïa ki paidbah.
U Bah Prestone u la ong ruh ba u kwah ban pynshai khnang ïa katei ka phang namar ki don ki khubor kiba sdang ban pynsngewthuh bakla halor ka jinglum kyrteng jong u Bah Kansing ïa ki nongïoh jingmyntoi lyngba katei ka skim. U ong ruh ba ki la don kiba pyntieng ruh ba ym dei satia ban ai ïa ki account number da kaba kynnoh ba kadei ka kam thok.
“Kane kadei ka skim kyrpang ba ka sorkar ka sam kaba la thaw ha ka dur ka Farmer’s Group ba tip kum ka FOCUS kaba pyntrei ban ïarap ïa ki nongrep da kaba thaw lyngba ki group bad hadien kane yn sa phah pat ïa ka pisa sha ki account number jong ki,” la bynrap shuh shuh u Bah Prestone.
Haba ïadei pat bad ka surok kaba la sniew bha kaba don kumba ar kilometer ei ei, na ka liang u Symbud Myntri Rangbah u la ong ba ha kine ki khyndiat por kin sa bthah noh ban sdang noh ïa ka kam.
“La wan khnang kat u Myntri Rangbah bad Symbud Myntri Rangbah ban ym leh ym long shuh, kumta ngan sa bthah ban sdang phah trei noh ïa kane ka surok ha kine ki taiew ban wan. Kane ka jingleh kam dei ba ngi wan ban pynbiej hynrei ngi leh namar ki paidbah ki donkam hynrei ïa ka vote ka shong marwei marwei. Hynrei haba ngi ïohi ïa kane ka jingeh na ka liang ka sorkar bad na ka liang kiba don ha ka sorkar la kumno kumno ki la dei ban pyrkhat khia.”