Haduh 250 ki samla kiba la shah pyntbit ban ïarap ïa ki paidbah lada wan ka jinglynshop ka mariang

Nongstoiñ, Naitung 10: Kum ka jingpynkhreh ban ïarap ïa ki paitbah ha kano kano ka por lada jia ka jingshah lynshop ha ki bor ka mariang kum u jumai, ka erïong erngit , ka jingpluh ding, shlei um, twa khyndew bad kiwei kiwei ka District Diasaster Management Authority West Khasi hills lyngba ka la pynlong ïa ka jinghikai pyntbit ïa ki samla kiba pule ha ki skul bapher bapher ha ka thaiñ Nongstoiñ kiba la tip kum ki Yuva Apda Mitra Vlunteers kaba la tip ruh kum ka Yuva Apda Mitra Schemes kaba la bei pisa da ka National Disaster Management Authority jong ka sorkar pdeng lyngba ka Ministry of Home Affairs.
Hadien ba kitei ki arspahsanphew ngut ki samla ki la pyndep ïa ka jingshah hikai pyntbit ki ophisar jong ka District Diasaster Mangement Authority ki la pynlong ïa ka jingïakynduh lang ha TRYSEM hall ha ophis jong ka Deputy Commssioner ka West Khasi hills na ka bynta ban sam ïa ki tiar ba kitei ki Volunteers kin pyndonkam ha ka por ba ki lei tai jingïrap ïa ki paidbah lada ki ngat ha ki jingeh ha ki por ba wan lynshop ki bor ka mariang.
Ha katei ka sngi shuwa ban sam ïa ki tiar ba kongsan sha ki volunteers la pynlong ïa ka jingïalang ba lyngkot ha kaba u bah D.Chyne District Disaster Management Authority Officer u la pynshai ha kaba ïadei bad ka jingdon kam ban ai jingïarap sha ki paidbah.
Ha katei ka sngi ka Smt Hema Nayak IAS Deputy Commssioner ka West Khasi hills ka la long ka kongsan. Ka Smt Nayak haba ai jingkren kum ka kongsan ha katei ka sngi ka la ong ba ka jingpynlong ïa katei ka jinghikai pyntbit ïa ki samla ka long kaba jop bad ka la kyntu ruh ïa ki volunteers kiba la pyndep ïa ka jingshah hikai ba kin ai ka jingshakri kaba paka ïa ki paidbah ha kano kano ka por ba ki donkam kyrkieh ïa ka jingïarap haba wan ka jingshah lynshop ha ki bor ka mariang.
Ka la ong ruh ba wat la ha kine ki sngi kim pat don kino kino ki jingshah lynshop ha ki bor mariang hynrei katei ka jingai jinghikai ka long kum ka jingpynkhreh lypa bad ka jingpynkhlaiñ ïa ki kynhun kiba lah ban leit ai jingïarap lada ka jinglynshop ki bor mariang kan jia ha kano kano ka por bym poi pyrkhat la ka dei ha kano kano ka jaka, ka shnong bad ha baroh kawei ka district. Na kitei ki arspah sanphewngut ki volunteers ki don saw ngut ki ba la ïoh ïa ka kyrdan ba nyngkong ha ka jingshah pyntbit bad kita ki long u Samla Borisbok Nongsiej, ka samla Daiahunlang Lyngkhoi, u samla Rishanbatskhem Sohshang bad u samla Alabastar Dkhar.
Kiba wan ha ka kyrdan ba ar pat ki long u samla Lipston Diengan , u samla Seneyangzu R Marak, u samla Balajied Parïong bad u samla Mebannagsan Puweiñ. Kiba wan ha ka kyrdan ba lai pat ki long ka samla Ribashisha Lyngkhoi, u samla Dhanborlin Syiemïong, ka samla Jenita Lyngkhoi bad ka samla Badalin Mawsymbai. Ïa ki tiar ba kongsan la sam da ka Smt Hema Nayak IAS Deputy Commissioner kaba long ka kongsan.