Haduh 22hajar ngut ki samla ba aplai na bynta ki 445 tylli ki kam ba lait ha Civil Defense

Shillong, Naiwieng 06 : Ki la don haduh 22,742 ngut ki samla kiba aplai na bynta ki 445 tylli ki kam kiba lait ha ka tnad Meghalaya Civil Defense and Home Guards jong ka sorkar jylla, pyntip u Myntri ka tnad, Bah Comingone Ymbon ha kane ka sngi Balang.
“Ka jingdon kiba aplai ka la bun bha haduh 22,742 ngut na bynta ki 445 ki kam kiba lait,” ong u Ymbon.
Ka jingpynkhreh na bynta kane ka jingthung kam kaba kynthup naduh ka Physical Efficiency Test (PET) kan long naduh ka 18 tarik haduh ka 21tarik Naiwieng mynta u snem.
Ki kam kiba lait ki kynthup ïa ki ar tylli ki kam Sub-Inspecotr, 284 tylli ki kam Guardsmen, 17tylli ki kam draibar bad 140 tylli ki kam Non-Combatant Employees (NCE). Katei ka jingpynrung kam kan long ha Shillong bad kumjuh ha Tura.
Ïa ka PET nyngkong la pynsangeh shwa na ka daw ka jingbym hun ïa ka jaka bad ruh hadien ka jingujor bad ka jinglap da u Myntri kumta la rai ban pynlong noh ïa ka PET naduh ka 18 haduh 21tarik Naiwieng 2024.
La pyntip ruh ba na bynta kito kiba la dei ban pyndep ïa ka Physical Measurement Test (PMT) bad ka PET ha ka 4, 5, 7, bad 8 tarik Risaw kynthup lang ïa kito kiba la pyndep ïa ka PMT bad PET ha ka 2 bad 3 tarik Risaw kin hap ban download ïa ka Admit Card.
Ïa kine ki Admit Card lah ban ïoh ha ka website jong ka department – www.meghomeguards.gov.in naduh ka 6tarik Naiwieng, 2024.